رضا عبد العال يضع التشكيل الأمثل للأهلي أمام الوداد: الشناوي يقف.. ومعلول وكهربا ومروان عطية احتياطي

وضع المحلل الرياضي الكابتن رضا عبد العال، نجم الأهلي والزمالك السابق، التشكيل الأمثل للمارد الأحمر أمام الوداد المغربي في إياب نهائي دوري أبطال إفريقيا.

وقال رضا، خلال لقائه أمس السبت ببرنامج “اللعيب” الذي يقدمه الإعلامي الرياضي مهيب عبد الهادي، ويعرض عبر قناة “MBC مصر” عن المباراة: “قول يارب وتفائل خير الأول إن ربنا يهدي المدير الفني ويحط تشكيل كويس”.

وأضاف: “انت رايح عندك ميزة كسبان 1 / صفر.. و1 / صفر دي تخليك تاخد البطولة.. هو عليه دلوقتي إنه يحط تشكيل كويس.. اللي هو لازم يبقى فيه تغييرات.. الشناوي لازم يقف.. الشناوي لازم يقف عشان خبرة.. دي نمرة واحد.. رقم اتنين لا قدر الله لو حصل حاجة مصطفى شوبير اللي هيشيلها حتى لو مش غلطته.. فلازم الشناوي هو اللي يبدأ كراجل اتعود ع الحاجات دي.. هو الشناوي لعب كام نهائي؟ كتير فإذن مش هيبقى مخضوض واخد ع الأجواء دي إنما شوبير أكيد لا قدر الله هيهتز.. هنا كان معايا جماهيري وهو اللي طلع النتيجة كده.. وأول ما نزل عشان يسخن جمهور النادي الأهلي أداله الدفعة وأداله الثقة وأداله الآمان وأداله الاستقرار النفسي عشان كده كان واقف على رجله وكان مركز أوي”.

وتابع: “كخبرة الشناوي يقف في الماتشات دي.. وعلي معلول.. انت رايح وكسبان 1 / صفر.. لو أنا متعادل هنا ألاعب علي معلول.. أنا عايز أأمن.. وبعدين انت عندك 3 لاعيبة يفرقوا مع أي حد حسين الشحات وبيرسي تاو وأحمد عبد القادر لو هتلعب بيه”.

واستكمل: “الشناوي.. وياسر إبراهيم.. ومحمد عبد المنعم.. محمد هاني.. خالد عبد الفتاح.. حمدي فتحي.. ديانج.. السولية.. حسين الشحات.. بيرسي تاو.. أحمد عبد القادر”.