قامت الاعلامية المعروفة ياسمين عز، بالهجوم على مُذيعة مشهورة دون أن تقوم بذكر اسمها، وذلك بسبب الحديث عن عدم وجود كرامة للمرأة بعد الزواج.
وأكدت الاعلامية، أثناء تقديمها لبرنامجها الشهير “كلام الناس”، والذى يُذاع من خلال فضائية “mbc مصر”، وقالت:ـ “بحمد ربنا إنوا شغلنى بنفسى مش بغيرى، وهو ده اللى مخلينى سعيدة أوى، وزمان قالوا حكمة حلوة أوى.. يا محلى المبسوطة قدام المشعوطة”.
وأضافت ياسمين:ـ “المبسوطة كل الناس عارفينها، وكمان المشعوطة يعنى متشعوطة كده.. لا حامى ولا بارد.. بالعربى مفلفلة يارب احفظنا، وأنا لما أتكلم عن الكرامة بين الزوج والزوجة.. هو إنتى زوجة؟، ولما أتكلم عن الراجل والست؟.. هو إنتى ست؟”.
وتابعت الاعلامية:ـ “هو إنتى ست زى اللى أقصدها؟.. خالص إطلاقاً، وياريت تشوفى نفسك لو ممغوصة من نجاحنا خدى مسكن، ولو إنتى مشعوطة من كلامنا خدى مهدئ”.
وأوضحت:ـ “ولو حابة تكونى راس براس وند بند حبى، ولو عاوزة تبقى مسترجلة عوزى، وفى كل الأحوال النوع ده بتاع الصوت العالى والردح للرجالة والتحريض على خراب البيوت.. حاسبينها على القسم الرجالى، ولما تجيلك واحدة معقدة ومُحرضة وتجاربها كلها فاشلة، وليكن من جماعة الست تبات بره بيتها من غير إذن جوزها، ومن غير ضابط ولا رابط”.
وقامت ياسمين بتوجيه سؤال للمذيعة:ـ “إيه دخلك بين المتزوجين؟.. إيه حشرك بين المتهنيين؟.. إيه علاقتك بالبنات المتهنية السعيدة، وبجد المنطقة دى محظورة متجيش جنبها تانى.. المنطقة دى كلها دلع وحب وبنات متهنية، ولو جيتى هنا هتتحرقى يا ماما”.
وأنهت الاعلامية هجومها وقالت:ـ “قلت قبل كده من دق الباب لقى الجواب، ودرسنا زمان قانون نيوتن بتاع الفعل ورد الفعل، واللى قال لكل فعل رد فعل مُضاعف له في القوة ومُضاد له في الإتجاه، ومحذراً إياه في الرجعة، (وإن عدتم عدنا وإن قلتم قلنا)”.
