ياسمين عز للسيدات قبل مباراة القمة: «الأهلاوى مش بيوافق غير بالمركز الأول والزملكاوى أصيل ومش ممكن يخونك»
قامت الاعلامية المعروفة ياسمين عز، بتوجيه مجموعة من النصائح للسيدات، بخصوص التعامل مع الأزواج أثناء مباريات كرة القدم، وأكدت على أن الزوج المصرى يُعانى من حالة طارئة تُسمى “القمة فوبيا”.
وأكدت ياسمين، أثناء تقديمها لبرنامجها الشهير “كلام الناس”، والذى يُذاع من خلال فضائية “mbc مصر”، وقالت:ـ “الناس ملهاش سيرة من إمبارح غير روعة الماتش وجمال التنظيم في الرياض، وكمان ملهاش سيرة غير ماتش القمة القادم بين الأهلي والزمالك، وبجد الماتشات اللى زى دى بيكون ليها طقوس خاصة داخل البيوت، ولو واحدة إتصلت بخطيبها ومردش عليها متزعلش، وده علشان هو بيكون في دنيا غير الدنيا، ولو جوزك معرفش ينام إوعى تفتكرى إنوا بيفكر في واحدة تانية.. لا ده بيفكر في نتيجة الماتش بكره”.
وتابعت الاعلامية:ـ “وأكيد اللى جوزها أهلاوى بيسأل نفسه كهربا هيلعب أساسى ولا احتياطى؟، ومحمد شريف ناوى يرجع زى الأول ولا لأ؟، وإنتى ولا على بالك حاجة عن الصراع ده، ولو تكرمتى تفادى جوزك وبلاش تطلبى منه أى حاجة ملهاش لازمة، وده علشان هو عنده كام يوم في السنة وإنتى عندك طول السنة”.
وأضافت ياسمين:ـ “وبجد مش لازم تطلعى المشاكل دلوقتى يا مدام جوزك دلوقتى مهموم.. هو يا حبيبتى بيكون عنده عرض طارئ إسمه القمة فوبيا، وبيفكر لا قدر الله لو فريقة خسر هيهرب فين من التحفيل اللى بيحصله من أصدقائه، ولو فريقة إتغلب متبقيش إنتى وأصدقائه والزمن عليه، ولو جوزك زملكاوى عمره ما هيخونك، وده علشان عنده وفاء وإخلاص مش هتلاقيه في حد تانى، وأقل كلمة بترضيه وبيعشق المتعة واللعبة الحلوة بغض النظر عن النتيجة”.
وأنهت الاعلامية حديثها وقالت:ـ “الراجل الأهلاوى أصيل ومش بيوافق غير بالمركز الأول، وكمان عنده قوانين صارمة وبيركز على هدفه، وبيحتفل بمناسبات غريبة بتخلد أمجاده، ولو شلتيه في عينك هيطبق عليكى كل شعارات التالتة شمال، وهيهتف بيكى وهيقولك إنوا من صغروا وهو بيعشقك، والراجل سواء كان زملكاوى أو أهلاوى مفهوش عيوب وكلهم طمعانين وهايلين”.
