قامت الفنانة شيرين رضا، بتوجيه مجموعة من الرسائل للأمهات، والتى تنصحهن بعدم السماح لأزواجهن بأن يضربوا بناتهن أو يعنفوهن، وكشفت عن رأيها في الفرق بين تربية الأولاد والبنات.
وأكدت الفنانة في تصريحاتها، من خلال ندوتها مع القاهرة 24 وقالت:ـ “كتير من الأمهات بيسمحوا لأزواجهن بأن يقوموا بتعنيف بناتهن وضربهن، وأكيد الأمر ده مش مقبول لما تخلفى وتجيبى طفل للحياة.. مش ذنب الطفل إنك جبتية الحياة، وطبيعى إنك تحافظى عليه لحد ما يكبر، ومش هينفع تسيبيه ملطشة ليه في الراحة والجاية”.
وأما عن الفرق بين البنات والأولاد علقت الفنانة قائلة:ـ “من المؤكد إن البنات بتسمع الكلام أكتر، ومش هقدر أحدد تربية البنات أسهل ولا الأولاد بالنسبة ليا، وده علشان عندى بنت وحيدة في الحقيقة، ولكن في التمثيل بنكون أصحاب، وإحنا بس أمام الكاميرا بنكون أُمهات”.
وتحدثت الفنانة خلال الندوة، عن كواليس ظهور والدها الراحل محمود رضا، ضمن أحداث مسلسل “وبينا ميعاد” بأحد المشاهد، وعلقت قائلة:ـ “مكنتش راضية ومعترضة عليه، وده علشان المشاهد بقالها 20 حلقة مثلاً بيشوفنى في شخصية نادية”.
وتابعت شيرين:ـ “ولما محمود رضا يظهر كده يبقى كسر الشخصية، ورجع للجمهور شخصية شيرين رضا، وأكيد إنى عاوزه أبويا بس عاوزة أفضل نادية، ومكنش في أمامنا تليفزيون كانت كاميرا”.
وأنهت الفنانة حديثها، حيث كشفت عن الفرق بين شخصيتها الحقيقية وشخصية نادية، وعلقت قائلة:ـ “أنا مش أُم شديدة نهائى، وكمان في مشاهد مكنتش عاوزة أقول الكلام اللى فيها، وده علشان هى مش شبهى خالص، وشخصية نادية مش شبهى تماماً، وأُمى مربتنيش كده ولا أنا ربيت بنتى كده بس ده ميمنعش إنى حبيت شخصية نادية بردوا، وده لأنها حقيقية ومسكينة ومحترمة، وعشان عرفت تربى بناتها كويس وتاخد بالها منهم، ولما وقعت في مشكلة بسبب اختيارها بين بناتها وحبها إختارت بناتها”.
