كشفت الراقصة المعروفة صافيناز، عن كواليس من حياتها الشخصية والمهنية، وأكدت على أنها ستعتزل الرقص بعد أن يتقدم بها العمر وإذا أنجبت طفل ستتفرغ لتربيته، وأنها نجمة شباك وأن الكثير من الراقصات يقومن بتقليدها وأنها فنانة ولها الكثير من الأعمال الفنية.
وأكدت الراقصة، أثناء تصريحاتها لـ القاهرة 24 وقالت:ـ “أنا مُميزة وكل اللى على الساحة بيقلدونى، وده بجانب إنى مُمثلة وليا تاريخ كبير في السينما ونجمة شباك، وكمان رقصى لا يحمل إغراء، وسوف أعتزل الرقص بعد أن يتقدم بيا العمر، ولو أنجبت طفلاً سأتفرغ لتربيته وأترك الرقص، وكمان أغلب جمهورى من الستات مش من الرجالة، ومتعرضتش للتحرش إلا من السيدات”.
وحينما سؤلت عن غلاء أسعار الراقصات أجابت:ـ “مش كلهم غاليين، والغلاء ده أمر طبيعى علشان كل حاجة بتغلى، وكمان البدل بقت غالية أوى وبتبدأ من 20 ألف جنية، والمطربين أجورهم أعلى مننا بكتير أوى، ولو خدتوا بالكم من أجر المطربين هتعرفوا أد إيه أجر الراقصات رخيص”.
وأما عن كونها مُميزة ردت:ـ “أنا مُميزة علشان الكل بحاول يقلدنى، ومفيش حد عمل حركة جديدة.. بيقلدوا حركاتى وبيلبسوا نفس بدلى، وكمان الكلام اللى بقولوا بيقولوه، وعلى فكرة أنا مش راقصة وبس أنا مُمثلة وليا تاريخى الفنى وأفلامى نجحت ومفيش حد عمل اللى أنا عملته وبحضر لفيلم جديد هيكون مفاجأة، وبجد عندى تارجت إنى أكمل في التمثيل، وعملت 5 أفلام وكنت بطلة ونجمة شباك، وأفلامى كانت بتنزل جمب أفلام ياسمين عبدالعزيز وغادة عبدالرازق”.
وأضافت:ـ “وبالنسبة ليا غالية عشان مش هينفع أكون مرمية في كل حتة، وكمان أكتر الأماكن اللى برقص فيها مبيكنش فيها خمور، وده عشان أغلبها بتكون حفلات عائلية، وأنا موصلتش للنجومية دى كلها وأتمرمط، ومش هينفع أرقص في أى مكان وخلاص، ومش كل يوم بشتغل وبتمرمط وده لأنى نجمة مشهورة”.
