صرحت الفنانة الجميلة نيللى كريم، عن كيفية تعاملها مع السوشيال ميديا، وأشارت إلى أن هناك حرباً إلكترونية معظم الوقت، وتحدثت أيضاً عن تأثرها بالراحلة فاتن حمامة.
وأكدت الفنانة، أثناء استضافتها ببرنامج “طريق ثالث”، والتى تقوم بتقديمة الاعلامية إيناس سلامة الشواف، والذى يُذاع عبر إذاعة “راديو إنرجى 92.1″، وقالت:ـ “بجد السوشيال ميديا قاسية أوى معظم الوقت، ودايماً في حرب إلكترونية شغالة، ويمكن يكون ده السبب اللى بيخلينى حريصة طول الوقت في التعامل”.
وتابعت نيللى:ـ”أنا والسوشيال ميديا مش صحاب، وبحب أتكلم عن أعمالى بس من خلالها، وكمان مش ممكن أرد على أى شحص ومش بنشر صورى مع اولادى عليها”.
وتحدثت الفنانة خلال اللقاء، عن المواقف والأشخاص اللذين أثروا فيها خلال حياتها، وعلقت قائلة:ـ “فى مواقف وأشخاص كتير أثروا عليا، وخصوصاً إن حياتى فيها تنوع واختلاف كبير، وأنا بدايتى كانت مع الفوازير وكانت حلم كبير بالنسبة ليا وغيرت فيا، وبعدها اشتغلت مع الفنانة الراحلة فاتن حمامة في مسلسل وجه القمر، وحقيقى اتعلمت منها كتير لأنها إنسانة مثقفة وبتحب الحياة، ولما إتعاملت معاها عرفت طبيعة المجال اللى إحنا شغالين فيه”.
وتحدثت نيللى أيضاً، عن والدتها وعن مدى تأثرها بها وقالت:ـ “والدتى أثرت فيا بشكل كبير، وده علشان هى دايماً بتشوف إن المرأة لازم تكون قوية وعملها أمر ضرورى، وكمان أولادى أثروا عليا وبقيت بقلق عليهم وبحاول أعيش معاهم مشاكلهم”.
وأنهت الفنانة حديثها، عن هوايتها المُفضلة بجانب العمل بالفن حيث قالت:ـ “أنا بحب أستمتع بكل لحظة في حياتى، وده علشان أنا بحب التمثيل والرسم والموسيقى والرقص، وبحب أعمل أكتر من حاجة مش التمثيل وبس، وده بمعنى إنى بعرف أخيط وأعمل شغل يدوى وحاجات تانية كتير”.
