ميار الببلاوى عن رفضها تصوير مشاهدها الجريئة في نهار رمضان: نجلاء فتحى قالتلى رمضان بتاع الفقراء وبس

أثارت الاعلامية والفنانة المعتزلة ميار الببلاوى الكثير من الجدل، وذلك بعد تصريحاتها بأن الفنانة نجلاء فتحى نصحتها بأن تقوم بتصوير أحد المشاهد الجريئة بفيلم “ديسكو ديسكو” في نهار رمضان.

وعلقت ميار، أثناء استضافتها على فضائية “القاهرة اليوم” من خلال برنامج “قعدة ستات”، والتى تقوم بتقديمة الاعلامية مروة صبرى، وقالت:ـ “لما رفضت أعمل المشهد الجرئ مع الفنان عمرو عبدالجليل بالنهار في شهر رمضان قعدت أعيط، وأنا ساعتها كان عندى 17 سنة ولسه صغيرة، والفنانة نجلاء فتحى قالتلى بصى يا حبيبتى رمضان ده إتعمل علشان الفقرا وبس، وكمان الناس الأغنياء بيعملوا نفسهم مبيكلوش بس أمام الفقراء يعنى وكده”.

وتابعت ميار حديثها:ـ “يعنى من الآخر وبكل صراحة رمضان بتاع الفقراء بس مش بتاع الناس العادية.. إحنا عندنا أكل نصوم ليه؟، وهى قالتلى كده ساعتها علشان عاوزانى أصور المشهد وخلاص، والموضوع مش محتاج إنك تعطلينا.. مفيش حاجة اسمها رمضان”.

وأضافت الاعلامية:ـ “أغلب مشاهد الفيلم الشهير (ديسكو ديسكو) كانت بالنهار في رمضان، وأنا بصراحة كان عندى عقدة اسمها التصوير في رمضان، وبالرغم من إنى كنت لسه صغيرة وبلبس وكده، ولكن المشهد المهبب بتاع المايوه مكنتش عاوزة أعملوا على الإطلاق، ولكن إيناس الدغيدى ساعتها مرمطت بيا الأرض، وقالتلى إجرى إلبسى المايوه التانى”.

وأنهت ميار الببلاوى حديثها وقالت:ـ “وأنا ساعتها فضلت أضيع في الوقت لدرجة إنى دخلت الحمام، وهما فضلوا يخبطوا عليا لحد ما المغرب يأذن، وكنت بقول لنفسى لو هعمل حاجة غلط على الأقل بعد الفطار مش وأنا صايمة، وربنا يسامحنى بقا”.