قام الاعلامى جابر القرموطى، بالاشادة بالفنانة دنيا سمير غانم، وذلك بعد تقديمها لمسلسل “جت سليمة”، والذى تم عرضه خلال السباق الرمضانى للعام الحالى 2023، موضحاً بأن والديها الراحلين لم يموتا وأنهما تركا وراءهما من يُكمل ما بدأهُ.
وأكد القرموطى، من خلال تقديمة لبرنامج “مانشيت”، والذى يتم عرضه من خلال فضائية “cbc”، وقال:ـ “للمرة الأولى في حياتي لم أشعر بأن الراحل سمير غانم مات، ولم أشعر بأن الراحلة دلال عبدالعزيز ماتت أو رحلت، وده علشان لاقيت في الفنانة دنيا سمير غانم العبقرية، يعني في هذا السن وبهذه الاختيارات وبهذا الزخم، وبقدرتك على إنك قدرتي تخشى كل بيت باحترام.. فدي معادلة صعبة أوي”.
وتابع الاعلامى:ـ “إنتي خدتينا السنة دي بعمل رائع جداً.. عمل خلانا نشعر إننا عندنا امكانية إننا نعيد تاني حاجات مهمة أوى زي الفوازير بتاع زمان.. الاستاذة نيللى والاستاذة شيريهان والاستاذ سمير غانم والاستاذ يحيى الفخرانى والاستاذة صابرين، وغيرهم كتير من الفنانين اللي كنا بنقعد نتفرج عليهم وإحنا صغيرين”.
وواصل جابر:ـ “وبجد بتمنى إنك تدرسي موضوع الفوازير، ويبقى عندنا السنة اللي جاية فوازير بتتقدم بشكل مختلف ورائع وجديد، ومحمد سلام رائع ولكن المشروع الفكري والذهنى والفنى عند الفنانة دنيا سمير غانم مشروع رائع ومُحترم، وأنا بهنيكي السنة دي على اللي إنتي قدمتيه، وبقولك ده امتداد طيب للي عمله الراحل سمير غانم والراحلة دلال عبدالعزيز”.
وأنهى الاعلامى حديثه وقال:ـ “وفي النهاية بوجه الشكر للشركة المتحدة، وبقدر الجهد المبذول والامكانيات الهائلة اللي قدمت في رمضان، وبشكركم على الأعمال التي قدمت هذا العام.. مفيش مسلسل يخدش الحياء حقيقة.. مفيش عمل فني يخدش الحياء، وكل الأعمال الفنية اللى اتقدمت ذات هدف وذات قيمة، وبعض الأعمال كانت الناس واخدة بالها منها كويس وكانت مُتجاوبة معاها”.
