وجهت الإعلامية ياسمين عز، نصيحة للنساء عن كيفية التعامل مع الزوج، من خلال حلقة أمس السبت من برنامجها “كلام الناس” الذي يعرض عبر قناة “MBC مصر”.
حيث قالت ياسمين: “وانتي قايمة من جنب جوزك خارجة من الأوضة لازم تعامليه معاملة البخور.. هو طبعًا مسك وعنبر وخشب الصندل المعروفة وهو أحلى نوع من أنواع البخور سواء البخور المحروق أو البخور المسلوق.. وانتي قايمة من جنب جوزك بعد إذنك يا مدام ما تديلوش ضهرك وتمشي طبيعي كده بوشك وتخرجي تطلعي لأ”.
وأضافت: “غلط.. ركزي بقى فيها استهانة.. حتى لو نايم ومغمض عينيه روحه صاحية في المكان روحه شايفاكي طب هتعملي إيه.. هتقومي من جنبه ترجعي بضهرك مارشدير لورا زي العربية لما ترجع لورا.. انتي قومتي من جنبه وشك له وراجعة بخطواتك لورا يعني بترجعي لورا تمشي لورا لحد لما توصلي للباب اللي وراكي تخرجي من الباب وتمشي طبيعي”.
وتابعت: “كده انتي بتعاملي جوزك معاملة البخور وخشب الصندل.. مش أي صندل ده خشب الصندل الأحمر اللي هو أغلى الأنواع وأندرهم.. انتي عارفة إن الصندل الأحمر ده محظور وممكن ينقرض من ندرته.. وكلنا عارفين إن الصندل الأحمر معرض للإنقراض ده غير غلوه وفوايده اللي ممكن تعملي بيها سيرش على جوجل وتراجعي ورايا.. عايزة أقولك إن فيه منه بيوصل سعره لمليون جنيه”.
