ياسمين عز: البنت قبل قراية الفاتحة لو تطول تشيل مامة العريس فوق دماغها وتلف بيها زي المروحة هتعمل كده

تحدثت الإعلامية ياسمين عز، خلال حلقة أمس الجمعة من برنامجها “كلام الناس” الذي يعرض عبر قناة “MBC مصر” عن مراحل تطور العروس.

حيث قالت: “البنات اللي بيكونوا قبل قراية الفاتحة زي النسمة ما تسمعلهمش حس.. ما بيقولوش غير حاضر ونعم وطيب وأوامر وانتوا عارفين.. وتقول لحبيبها بدل ما تجيب لي هدايا وورود حمرا هاتلي مامتك تخطبني.. ولو تطول تشيل مامة العريس المنتظر فوق دماغها وتلف بيها في الشوارع زي المروحة هتعمل كده”.

وأضافت: “تبقي يا حبيبة قلبي العريس وأهله بيروحوا يطلبوا إيديها يبقى وشها في الأرض وصوتها مش طالع بتتكلم لجوه الكلام بتبلعه من كتر الرقة والإحساس وكل ما حماتها تقولها حاجة ترد عليها وتقولها حاضر يا طنط.. طبعًا يا طنط.. عندك حق يا طنط.. شوف طنط بعد شوية هيحصل معاها إيه.. كله كوم ويوم ما ينزلوا بقى ينقوا الفرش والعفش ده كوم تاني خالص”.

وتابعت: “تلاقيها مكلمة عريسها المكالمة الشهيرة بتاعت ليلة الفرش بالليل اللي هيشتروا فيه الفرش.. بص أنا محدش يختارلي الفرش بتاعي آه.. لو مامتك جت معاك بكره أنا مش نازلة.. مش نازلة أنقي ولا أشتري حاجة.. خلي مامتك بقى هي اللي تختار الفرش.. وخليها بالمرة تقعد معاك في البيت كمان.. أنا مش متجوزة ولا عايزة أتجوز.. وتقفش وتروح قافلة السكة”.