ياسمين عز: اللي بتغير على جوزها من السكرتيرة سيبيه يهزر معاها براحته.. المهم هو بيروح لمين في النهاية

واصلت الإعلامية ياسمين عز، مقدمة برنامج “كلام الناس” الذي يعرض عبر قناة “MBC مصر” إثارة الجدل بتصريحاتها حول العلاقة بين الرجل وزوجته.

وقالت ياسمين، في حلقة أمس الخميس من برنامجها: “في موضوع شوية خاصة بقصة إنه أو يعني الحقيقة بتعاني منه بيوت كتير في مصر وهو لما يصادف إن راجل ومراته يكونوا بيشتغلوا مع بعض في نفس المكان مش محتاجة أقول.. أنا بشوف وناس كتير بتشوف إن اللي بيتظلم في الموضوع ده دايمًا هو الراجل لإنه يا حرام ويا عيني مش بيكون عارف الصداع هيجيله من أنهي ناحية أو مني أي ناحية لو جامل مراته بكلمة ولّا عاملها كويس زي ما بيعامل بقية زمايلها أو زملائها هتلاقي الموظفين اللي معاهم في الشغل هيقولك إيه بقى طبعًا ما هي مراته ولازم يعمل كده بدل ما تطين عيشته لما يرجع البيت.. ولو حصل العكس هتلاقي نفس الموظفين دول أو الزملا دول هيقولوا طبعًا شكلهم بقى متخانقين وبيعاقبها قدامنا”.

وأضافت: “ده كله كوم والصداع اللي بيجي من ناحية مراتك ده كوم تاني.. لو ابتسمت لواحدة من زمايلك تقولك طبعًا أنا مش مالية عينيه شايفني أباجورة جنبك في الشغل.. لو رقيت واحدة من زمايلها على حسابها تقولك طبعًا ده جزاتي عشان ماليش في الدلع والهزار والكذا.. ويا ليلتك اللي مش فايتة لو معدية جنبك ولقيتك بتهزر أو بتتكلم بأسلوب كويس مع واحدة من العملا.. تلاقيها بقى مشمرة وجاية بتجري كده عليك وتقولك انت مش محترم وجودي ولّا إيه إزاي مش محترم وجودي.. إيه اللي انت بتعمله ده.. هو بيتكلم عادي جدًا مع العميلة يعني بيتكلم بيشوف شغله.. ده مش ناقص غير إن أنا أجيبلكوا كوبايتين لمون وتقوم مبوظالك الشغلانة اللي انت بتعملها”.

وتابعت: “ده غير طبعًا الهاجس الموجود في خيال كل ست أصيلة وهو إن جوزها متجوز عليها مثلًا السكرتيرة ولّا متجوز عليها مثلًا ما أعرفش مين ودايمًا السكرتيرة دي مظلومة دايمًا الدراما والأفلام على طول يصدرلونا صورة كده أنا قاعدة في البيت وجايب سكرتيرة ليه ما يجيب سكرتير راجل.. عايزة أقول إن السكرتيرة الست بتكون ملمة بالتفاصيل وتمشي شغل جوزك أسرع شوية من السكرتير الراجل ولو إنه برضه لو في سكرتير راجل ده لا يقلل منه شيء وبيكون في شغله يعني عال العال.. ولكن الست بتهتم بالتفاصيل بقى الورقة دي مش عارف إيه مين مضى على إيه.. فممكن تكون هي يعني تكون سبب في تقدم زوجك في الشغل”.

واستكملت: “دايمًا برضه بشوف الست اللي بتغير على جوزها من السكرتيرة ولّا من زميلاته البنات في الشغل ولّا من حد بيشتغل معاه يعني أنثى زي مش عايزة أقول هي مش واثقة في نفسها ولكن في جزء بيكون خاص بالثقة بالنفس ليه تقللي من نفسك انتي عارفة قيمة نفسك كويس أوي يعني لا تقللي من نفسك ولا من قدرك انتي عارفة قيمتك وعارفة قيمة جوزك.. سيبيه يهزر ويضحك براحته فيها إيه يعني المهم في النهاية هو بيروح مع مين في النهاية هو بيروح لمين”.