ياسمين عز: بيصعب عليا العفش اللي كان رايح على 15 عربية في عز النهار.. يرجع متداري على نص عربية في نص الليل
تحدثت الإعلامية ياسمين عز، خلال حلقة أمس السبت من برنامجها “كلام الناس” الذي يعرض عبر قناة “MBC مصر” عن الخلافات على قائمة المنقولات الزوجية في حال الطلاق.
حيث قالت: “بيصعب عليا جدًا جدًا والله عفش العروسة والعريس وتبديل الحال من حال لحال.. ودوام الحال من المحال.. عفش العروسة أول ما تتجوز يروح لبيتها مرصوص ومترصص على 15 عربية تقعد بقى تقوله خلي بالك من الخشب لا يتجرح وخلي بالك من الصيني لا يتكسر وخلي بالك من الصالون المدهب اللي بيلمع ويبرق وخلي بالك من باب التلاجة لاحسن يقع والفرحة واللمة وولاد خالتك وولاد عماتك والزغاريد والهيصة اللي بتبقى في بيوتنا كلها باختلاف كل المستويات الاجتماعية”.
وأضافت: “أول ما يوصلوا لطريق مسدود الخناقة على القايمة والعفش.. كل واحد بيحس إن جواه نار قايدة هي تقول لازم أقهره على فلوسه.. وهو يقول أنا هاخد عفشي وحاجتي ومحدش يضحك عليا ده دم قلبي.. ويتكسر العفش على دماغ صحابه.. والعند آخر الجواز ويرجع العفش اللي كتبوا القايمة عليه يتكسر مهموم ملموم على نص عربية.. العفش اللي كان رايح على 15 عربية في عز النهار يرجع متداري على نص عربية في نص الليل.. علشان 30 ولا 50 ولا 100 ولا 200 ألف جنيه ولا مليون ولا اتنين”.
وتابعت: “بتنسوا المودة والرحمة بتنسوا الحب اللي كان بينكوا انتي بتنسي لما جابلك الحلو كله وانت بتنسى لما قعدت جنبك وانت سخن وتعبان.. انتي بتنسي لما جابلك حاجة حلوة أو حاجة بسيطة وافتكرك بيها وهو راجع من شغله وانت بتنسى لما كانت بتقفلك ليل نهار في المطبخ تخدمك وتخدم ولادك وبيتك”.
