تحدثت الإعلامية ياسمين عز، في حلقة أمس من برنامجها “كلام الناس” الذي يعرض عبر قناة “MBC مصر” عن الزواج في ظل ارتفاع الأسعار.
حيث قالت: “مع ارتفاع الأسعار فكرة الجواز بقت محتاجة قلب ميت.. الراجل يقعد يقول لنفسه أنا دلوقتي مطالب أجيب ورد وشوكولاتة ودباديب وهدايا وأدفع دم قلبي كل أسبوع في فسح وخروجات مع خطيبتي ده طبعًا غير الشبكة غير المهر غير الشقة والفرح وبعد كل ده أنا بشتري سمك في مية أو زي ما بيقولوا كده بطيخة يا تطلع حلوة وساعتها تشيلك في عيونها العمر كله يا تطلع ماسخة وما يجيش من وراها غير وجع القلب والمعدة والدماغ”.
وأضافت: “وياريت الموضوع بيقف عند كده وخلاص لأ ده يا نور عيوني فترة الخطوبة أو الفترة اللي قبل الجواز دي يتعرض الراجل المسكين لكافة أنواع الضغوط التي لا يتحملها بشر.. سواء من الغندورة العصفورة اللي هيتجوزها أو من أهل الغندورة العصفورة.. تلاقي مامتها وهو رايح يتقدم لها مشمرة دراعها كده وتقوله إيه إحنا بنشتري راجل.. طيب الراجل ده بتشتروه بكام يا حاجة؟ تقوم راصة بقى رصة الحلواني.. عارفة رصة الحلواني؟ ليستة طلبات تهد الحيل”.
وتابعت: “شقة تمليك وتكون جنب البيت عشان بنتي ما ينفعش تبعد عني نور عيني نظر قلبي شبكة ألماظ كام قيراط عشان هي مش أقل من هايدي بنت خالتها أو شبكة دهب كام كيلو عشان هي برضه مش أقل من بنت عمها مهر كذا فرش كذا وفرح كذا وهاتك يا كذا وكذا وكذا لحد ما العريس الغلبان يخرج من عندهم وشعره شاب وطقطق من كتر الطلبات اللي بيسمعها”.
