نصحت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” النساء بالابتعاد عن المشادات الكلامية مع أزواجهن.
حيث قالت: “بتتخانقي مع جوزك ليه؟ صوتك جايب آخر الشارع ليه؟ عايزة أفهم بجد.. تعالي نبتدي الموضوع من الأول وعايزة أفهم بتتخانقي مع جوزك ليه وبتعلي صوتك ليه.. أوعي تقوليلي ساعة شيطان لإنك اتخانقتي معاه.. ما تتخانقيش مع جوزك وتقوليلي ساعة شيطان.. الشيطان يا حبيبتي ما بيدخلش عند الست النكدية يدخل عندها يعمل إيه الشيطان ما هي قايمة بالواجب وزيادة”.
وأضافت: “ده انتي علمتي الشيطان الكسل.. يقعد مش لاقي حاجة يعملها.. قاعد بيتفرج عليكي ويسقف.. بيسقف في الخناقة وانتي بتتخانقي وبتعلي صوتك.. أنا نفسي توصلي في علاقتك بجوزك إن وانتي في نص الخناقة يقولك عيونك حلوة بدل ما يقولك وطي صوتك.. شوفي الفرق.. تخيلي وانتي بتتخانقي معاه وانتي مدبلة ومسهتنة.. أحسن من وانتي صوتك عالي.. فهيتقالك عيونك حلوين مش هيتقالك وطي صوتك.. مش هيقولك وطي صوتك وهو مصروع يا عيني وودانه مخرومة.. جبتيله الأذن الوسطى.. فمش شايف جمال عينيكي من علو ذبذباتك خرمت ودنه مش شايف”.
