وجهت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” عدة نصائح للسيدات للتعامل مع أزواجهن.
حيث قالت: “خلي بالك ما تتخانقيش بصوت عالي عشان هتتعبي.. انتي اللي هتتعبي.. وهيجيلك صداع ولو جالك صداع هتصدعي وهتصدعي اللي حواليكي.. إنما الراجل لو جاله صداع بيتشافى ذاتيًا.. ليه اسأليني ليه حلو السؤال لأنه مسكن.. مسكن نفسه.. مسكن منه فيه”.
وأضافت: “انتي لما يجيلك صداع مش هتتشافي ذاتيًا مش هتخفي.. هتفضلي كده قاعدة لنا بصداعك.. مش هتلاقي المسكن عارفة ليه؟ عشان الراجل هو أصل المادة الفعالة للمسكن أي مسكن ممكن تتخيله في حياتك.. والكلام ده مش من عندي لسه قارية دراسة عملوها في بلاد بره قصة طويلة ودراسة طويلة أحكيهالك الحلقة الجاية”.
وتابعت: “المهم يعني إن نتيجة الدراسة دي استخلصوا منها أن الرجل فعاليته زي المسكن بالظبط.. بل من الممكن أن يكون الرجل أقوى فعالية من المسكن شوفي بقى.. أنا من رأيي الشخصي مش عارفة اخترعوا مسكن ليه والراجل موجود في الدنيا.. ليه ناخد مسكن والراجل موجود نعمة ربنا في الأرض.. ومن الطبيعة طبيعي مش حاجة مصطنعة.. إنسان بشري مش أعشاب.. مسكن طبيعي.. أنا لو عليا مش مسكن بس أنا رأيي الخاص مش عارفة أصلًا اخترعوا دوا ليه وهو دوا.. ليه اخترعوا الدواء وهو الدواء”.
