واصلت الإعلامية ياسمين عز، تصدر التريند على مواقع التواصل الاجتماعي، ونتائج البحث عبر محرك البحث الشهير “جوجل” بسبب تغزلها المبالغ فيه بالرجل المصري وخاصة أطباء الأسنان، وذلك خلال حلقة أمس الأحد من برنامجها “كلام الناس” الذي يعرض عبر قناة “MBC مصر”.
وقالت ياسمين: “شوفي يا مدام لو جوزك دكتور أسنان يبقى أكيد ربنا بيحبك رزق وجالك عشان رزقك براجل في كل المواصفات اللي بتتمناها وبتحلم بيها أي ست لطيف متواضع متعاون مهذب لسانه زي ما بيقولوا كده بينقط سكر وشهد وعسل وشهد مكرر.. بؤه ده ما بيطلعش منه العيبة عارفة انتي المصطلح اللي يقولك الراجل ده فول أوبشن.. ده اتعمله مخصوص عشان يتقال على دكاترة السنان أو الأسنان”.
وأضافت: “يعني مثلًا صعب تقابلي دكتور أسنان وما تلاقيهوش كاريزما ودمه خفيف.. تحسي إن ربنا خلقهم بالميزتين دول تحديدًا ودايمًا الكاريزما انتي بتحسي انتي بتحسي إن دمه خفيف كاريزما كده ماشية ع الأرض وعامل زي المغناطيس.. تلاقي نفسك لا إراديًا بتتمغنطي وتتشدي لجوزك أو خطيبك دكتور الأسنان وبترتاحي في الكلام معاه ودي نقطة مهمة خلي بالك.. لدرجة إن في أوقات كتير بتبقي مش عارفة انتي متجوزة دكتور أسنان ولّا دكتور نفسي من الهنا اللي انتي فيه من كتر الراحة اللي بتحسيها معاه ومن كتر ما هو ما شاء الله عنده قدرة غير طبيعية على الاستيعاب والاحتواء ويتحملك في أقصى فترات عصبيتك”.
وتابعت: “تحسي كده إن هما بيدرسولهم الكلام ده في الجامعة في طب أسنان بعدين لو تلاحظي صوتهم شتوي طول الوقت مائل للجاذبية خلي بالك من الحتة دي نادرًا ما تشوفي دكتور أسنان صوته عالي أو بيزعق أو صوته جاهوري كده.. تحسيهم يا عيني من كتر البنج اللي بيستخدموه طول اليوم انعكس على شخصيتهم فبقوا هاديين وبشوشين”.
