ياسمين عز: شاكيرا بتقول إنها اكتشفت خيانة بيكيه من برطمان المربى.. صلحي كاميرات بيتكوا بدل ما تجيبي واحد يراقب جوزك

واصلت الإعلامية ياسمين عز، انتقاد النجمة العالمية شاكيرا، بسبب التشهير بزوجها السابق لاعب كرة القدم الإسباني جيرارد بيكيه، بعد انفصالهما، وذلك خلال حلقة أمس الجمعة، من برنامجها “كلام الناس” الذي يعرض عبر قناة “MBC مصر”.

حيث قالت: “شاكيرا بتقولك إيه بقى؟ اسمع قصص الست اللي م النوع ده.. بتقولك إنها اكتشفت خيانة بيكيه من خلال برطمان المربى.. شوف بقى العبث اللي إحنا وصلناله عشان تكرهنا في الراجل الأشقر المحترم ده.. بتدعي إن هي رجعت البيت مرة لقت برطمان المربى متاكل منه وناقص حتة فعرفت بذكاءها الخارق إن في واحدة بتيجي البيت من وراها تقعد مع بيكيه وبيخونها في بيتها عشان قال إيه بيكيه ما بيحبش المربى طول عمره.. فهنا شاكيرا حفيدة المفتش كرومبو اكتشفت الخيانة وقالتلك الدليل إيه المربى”.

وأضافت: “ما يمكن يا بنتي جوزك سكره بيوطى منك ولّا جوزك ضغطه بيعلى من عمايلك فخدله معلقتين مربى يظبطه سكره اللي انتي موطياه بينقذ حياته ولّا نسيبه يُغم عليه ويموت مالوش أهل ولا صاحب عشان حضرتك ترتاحي وبرطمان المربى بتاعك يرتاح مكانش برطمان مربى بـ 3 يورو يا حبيبتي مش كده.. تعالوا برضه بقى أوريكوا الستات الأجانب.. شاكيرا يا حبيبتي أنا في بيتنا وكلنا في بيوتنا عندنا كاميرات لو قطة عدت قدام الباب هترجعي الكاميرا وهرجع الكاميرا وأشوفها.. فمبالك انتي عايشة بره يعني التكنولوجيا كلها.. يعني تقدري تعرفي إذا فيه ست دخلت لجوزك من غيابك ومن وراكي ولّا لأ من الكاميرا مش من برطمان المربى”.

وتابعت: “إحنا مش عايشين في الغابة نقعد ندور في برطمان المربى.. طلعي لنا فيديو لو عندك فيديو طلعيه ده لو كان موجود أصلًا وكنتي هتفضحي الدنيا وتقلبي الدنيا.. بس بان هنا إيه لازمة التشهير بالراجل جوزك الأشقر المحترم.. ولو انتي واثقة من نفسك أوي كده وفي ست تانية دخلت كلت المربى بتاعتك اللي العالم كله عرف بيها ليه أجرتي واحد يراقب جوزك؟ طب ما تصلحي كاميرا بيتكوا ونخلص إيه لازمة المصاريف.. أمال يا حبيبتي لو كانت علبة الجبنة كنتي عملتي فيها إيه وفينا إيه؟!”.