ياسمين عز عن قصة ليلى والذئب: كانت عاملة لحماتها بامية قرديحي فالذئب كل ليلى عشان مش حاطة لحمة

أثارت الإعلامية ياسمين عز، جدلًا واسعًا بسبب حكاية “ليلى والذئب” التي حكتها بطريقة مختلفة، خلال حلقة أمس الجمعة من برنامجها “كلام الناس” الذي يعرض عبر قناة “MBC مصر”.

حيث قالت: “انتوا عارفين قصة ليلى والذئب.. انتوا عارفين إن ليلى كلها الذئب وقرقضها عشان كانت مزعلة حماتها وحماتها غضبانة عليها؟ اسمعي القصة الحقيقية قبل ما يحرفوها”.

وأضافت: “أنا هقولك الكلام اللي محدش بره هيقولهولك.. القصة أصلًا أسمها ليلى والذئب وحماتها.. بس هما قصوا حماتها وخلوها ليلى والذئب.. بيصدرولنا حاجات غريبة.. ليلى دي ست كانت عايشة في أول الغابة حاكمة على جوزها الغلبان الشقيان التعبان حاكمة عليه يقعد أمه اللي هي حماتها في بيت آخر الغابة لوحدها المسكينة اللي ربت وتعبت وجوزت ابنها الفرعون الكبير لـ ليلى.. وليلى حالفة ما تدخلها بيتها ولا تبيتها عندها في البيت وجوز ليلى ما باليد حيلة”.

وتابعت: “ليلى كانت بتودي لحماتها غدا أي كلام.. كل كام يوم توديلها غدا بدل ما تقولها تعالي يا طنط.. تعالي يا حماتي.. ولا تعالي يا ماما اقعدي معانا وسطنا في البيت دفينا واتدفي معانا واتدفي جنب الحطب اللي في الدفاية في الغابة التلج دي لأ.. ليلى رامية حماتها وحيدة في آخر الغابة كده مالهاش صاحب ولا أهل يسألوا عنها ولا ابن يسأل عنها”.

واستكملت: “المهم راحت ليلى تودي الغدا لحماتها كانت عاملة بامية وطبعًا عاملة لحماتها البامية سادة كده من غير حتتين لحمة.. قرديحي زي ما بيقولوا.. مع إن كل حاجة بفلوس جوزها.. البامية واللحمة والبيت والغابة بفلوس جوزها.. المهم راحت ليلى لحماتها ودخلت البيت وعشان حماتها كانت امرأة صالحة وطيبة وربنا راضي عنها ألهمها لحسن الحظ إنها تخرج بره البيت تجمع شوية حطب تدفي بيهم رجلها التعبانة اللي عندها روماتيزم فيها كان عندها كمان نقص فيتامين د.. فراحت تطلع كده حماتها تجيب شوية حطب تخش بيتها تاني.. تمام طلعت حماتها بره البيت والذئب بقى كانت متنكر ولابس لبس حماة ليلى وقاعد في السرير”.

وواصلت: “لما جت ليلى تدخل بيت حماتها عشان تدي البامية السادة لحماتها الذئب كل ليلى.. ليه؟ عشان ليلى ما كانتش حاطة لحمة في البامية.. لو كانت ليلى كريمة واحترمت حماتها واحترمت نفسها وحبيتها وقدرتها وحطت حتتين لحمة في البامية كان الذئب كل اللحمة وما كلش ليلى.. هو الذئب كان جعان وعايز ياكل أي لحمة مش متقصد ليلى”.