وجهت الإعلامية ياسمين عز، نصيحة للزوجات من خلال حلقة أمس السبت، من برنامجها “كلام الناس” الذي يعرض عبر قناة “MBC مصر”.
حيث قالت: “مش علمونا زمان إن الوقاية خيرًا من العلاج؟.. من بدري كده نقطع رجل الحكاية دي.. صاحبتي على عيني وعلى راسي في كل حاجة إلا جوزي.. كلميها على صفحة بتشتري منها هدوم أون لاين.. كلميها على مدرسة الدراسات الاجتماعية اللي تاعبة بنتك ولّا ابنك في المدرسة.. كلميها على سواق التاكسي اللي اتخانقتي معاه أول امبارح.. كلميها عن السوبر ماركت بتجيبي منه إيه.. كلميها عن أي حاجة إلا جوزك”.
وأضافت: “لا سي فلان جابلي ولا عملي ولا كذا ولا خرج مع أصحابه قعدوا على القهوة كذا ولا بيحب ياكل ورق العنب أكتر من الكرنب ولا القهوة بتاعته زيادة ولّا ع الريحة.. الكلام ده هي مالهاش علاقة بيه خالص التفاصيل دي ما تخصهاش خالص.. التفاصيل دي بتاعتك انتي وجوزك وبس.. راجلك انتي جوزك انتي ما ينفعش حد تاني يعرفها”.
وتابعت: “وبعدين بقى ما تجيش تقولي بعد ما صاحبتك تخطف فرعونك إنها طول عمرها كانت فاسدة ووحشة طب أما هي فاسدة ووحشة انتي مصاحباها وماشية معاها ليه من زمان؟ يعني هي كانت وحشة وانتي كنتي طير من طيور الجنة؟ ما انتي أكيد كنتي شايفة بس بتطنشي وما بتسمعيش الكلام.. أقولك تاكليني بسنانك بس ما تسمعيش الكلام.. امسكي فرعونك بإيديكي واعرفي إنه لو اتساب مش هيتجاب.. جوزك لو اتساب مش هيتجاب”.
