ياسمين عز: مرات ميسي عايشة لبيتها وجوزها وولادها.. إنما جورجينا 24 ساعة بتلف وبتبرم بره البيت
واصلت الإعلامية ياسمين عز، مقدمة برنامج “كلام الناس” الذي يعرض عبر قناة “MBC مصر” انتقادها لكريستيانو رونالدو، وصديقته جورجينا، ومقارنتهما بميسي وأنتونيلا، خلال حلقة أمس من برنامجها.
وقالت: “مع خالص محبتي واحترامي وتقديري لكريستيانو.. أنا بحس إن جورجينا دي من النوع اللي 24 ساعة شاردة.. شاردة بره البيت زي الغزال الشارد.. يعني مثلًا CR7 يناديها مثلًا جورجينا عايزين نتعشى مع بعض النهارده أنا وانتي والولاد.. فبحس إن هي ممكن تقوله لأ أنا عندي عرض أزياء النهارده أو تقوله والله أصل أنا رايحة بروفة عشان أقيس فستان للمهرجان”.
وأضافت: “24 ساعة تحس إنها بتلف وبتبرم بره البيت.. مش مهتمة بالجمعة البيتوتية.. مش مهتمة بالجمعة الأسرية.. على النقيد بحس إن أنتونيلا دي حتة نوتيلا شوكولاه.. بحسها عايشة لبيتها وجوزها وولادها.. وتحسوا ولادها نضاف.. يعني دايمًا كده شعرهم بيلمع ريحتهم بودرة أطفال.. ريحتهم نضافة.. عارفين ريحة النضافة ولا مش عارفين.. في أطفال كده ريحتهم من النضافة يقولك ريحتهم نضافة.. وبحس إنها أم بيت وست بيت زوجة وصالحة بمعنى الكلمة تحسها إنها برضه م الستات اللي بعد العشا كده تلاقيها مقطعة حتتين كيكة بالبرتقان وكوباية شاي وداخلة بيهم على جوزها في البلكونة.. وبعدين زي ما قولتلكم من شوية واخدة بالها من عيالها في كل حتة معاهم في الرايحة والجاية”.
وتابعت: “شايلة الولد الصغير يا حرام على قلبها يا عيني لا بتضايق ولا بتتذمر ولا في مرة شوفناها مجرجرة واحدة معاها تساعدها عشان تشيل ابنها ولا يعني عندها حاجات م اللي بنشوفها ولا واحدة بتساعدها زي ما ممكن يحصل عندنا كتير مع إن اللي زيها ممكن تجيب 100 واحدة تساعدها”.
