ياسمين عز: ميسي من ساعة ما مسك الكاس ما سابوش من أيده إلا لما شاف مراته.. رماه وخدها في حضنه

تحدثت الإعلامية ياسمين عز، في حلقة أمس الخميس، من برنامجها “كلام الناس” الذي يعرض عبر قناة “MBC مصر” عن علاقة الزواج والاستقرار بتتويج الأرجنتيني ليونيل ميسي بلقب كأس العالم.

حيث قالت: “قبل أي حاجة وكل حاجة لازم أقول الحمد لله والشكر لله.. يا جماعة أنا ربنا نصرني.. أوعوا تنكروا ما تنكروش إنكم في اللحظة اللي ميسي شال فيها كاس العالم افتكرتوني وافتكرتوا كلامي عن ميسي وأنتونيلا مراته”.

وأضافت: “شوفتوا الاستقرار والجواز يعمل إيه ويوصل لفين؟ أهو خد كاس العالم أهو.. شوفتوا الست لما تكون واقفة في ضهر جوزها وبتدعمه وفي نفس الوقت بتدلعه وتهننه وتحننه وبتاخد بالها منه وبتخليه كده أحسن حد في الدنيا شوفتوا إزاي بيبدع ويطلع أحسن ما عنده”.

وتابعت: “دي بتخليه عنده طاقة فوق طاقته وساعتها طبيعي جدًا الدنيا كلها بالنسبة لجوزها بتكون في كفة وهي لوحدها في كفة تانية.. مش عارفة خدتوا بالكوا ولا لأ بعد الماتش لما ميسي خد الكاس ومن ساعة ما مسك الكاس ما سابوش من إيديه خالص إلا في اللحظة اللي شاف فيها مراته أنتونيلا ورمى الكاس ونسي الدنيا كلها وخدها في حضنه تقريبًا خمس دقايق كده ولا حاجة وهي حبيبتي من كتر ما هي فرحانة وقلبها مرفرف من الفرحة مقدرتش تمسك نفسها واترمت في حضنه وفضلت تعيط”.