واصلت الإعلامية ياسمين عز، إثارة الجدل بحديثها عن العلاقة بين الرجل وزوجته الأولى في حال زواجه من امرأة أخرى، وذلك من خلال حلقة أمس السبت، من برنامجها “كلام الناس” الذي يعرض عبر قناة “MBC مصر”.
وقالت ياسمين: “حصل اللي حصل والراجل راح اتجوز واحدة تانية؟ مش هنسيبك أبدًا إحنا معاكي يا ست الكل.. مش هنسيبك وهنشتغل على مفاتيح الراجل من غير مشاكل معاكي.. مفاتيح الراجل تلاتة.. أمه وأخته وودنه.. أمه انتي عارفة حماتك هترجعوهلك.. أخته انتي عارفة التعامل عامل إزاي.. ودنه بقى هو عايز يسمع إيه؟ عايز يسمع كلام طيب.. عايز يسمع كلام حلو.. إذا كان في مشاكل وعناد وند بند وإذا ما كنتي غلطانة ما بقولش انتي تيجي على نفسك.. عايز يسمع كلام حلو”.
وأضافت: “طول ما انتي هنا اللي داخل.. بيقولوا الزن على الودان أمر من السحر.. طول ما انتي هنا الكلام طيب هيشوفك انتي ست الكل ومحور الكون انسي أي حد تاني.. راجعلك راجعلك.. فإحنا هنرجعهولك وما تخافيش إحنا معاكي.. طيب عملنالك الخطة ونجحت ورجع وساب الزوجة التانية لأي سبب كان بنتكلم بشكل عام.. السؤال ليكي هنا يا ست الكل ماذا لو عاد معتذرًا؟ يا أهلًا بيه والله يحيه هنرجع ونحافظ على بيتنا ومفيش كلمة طلاق إحنا بنعمر البيت ونسامح الراجل الغلبان إنه غلط ورجع لصوابه”.
وتابعت: “لو عاد معتذرًا هنعمل إيه؟ يا أهلًا بيه الله يحيه والعتاب والنقاش والقصص دي بعدين.. عشان نحافظ ع البيت ما تبقاش هي قاعدة حاطة رجلها في الشمس وانتي يا حبيبتي تتخسي وتتعبي ويبقى وشك قد اللقمة.. ما تديهاش الفرصة دي وتتمنعي عن الرجوع لأ نشوف وقتها ممكن نعمل إيه.. طبعًا ده في حالة في سكن ومودة ورحمة وحب مفيش أي مشاكل أنا بتكلم في الحالات الطبيعية”.
