ياسمين عز لكريستيانو رونالدو: ربنا عمره ما هيكرمك طول ما انت مجري جورجينا وراك ومنشف دماغك في موضوع الجواز

واصلت الإعلامية ياسمين عز، إثارتها للجدل برسالة جديدة لكريستيانو رونالدو، نجم منتخب البرتغال، من خلال حلقة أمس الخميس، من برنامجها “كلام الناس” الذي يعرض عبر قناة “MBC مصر”.

وقالت ياسمين، في رسالته للدون: “مفيش سيرة غيرة رسالتي اللي كنت بقولها لحبيبنا كريستيانو رونالدو بخصوص جوازه من الست جورجينا.. طيب هو انتوا عايزيني أقوله إيه يا جماعة.. خليك ماشي معاها كده سداح مداح.. تفضلوا كده عايشين كده ربنا يخليكوا ولادكوا ومفيش أي جواز.. دعيت لهم بالجواز يعني بجد مبقتش فاهمة الإخوة المعترضين معترضين على إيه.. هو الدعوة لستر بنت وجوازها بقت حاجة عيب وغلط؟”.

وأضافت: “إحنا بندعو للستر والجواز بقوله اتجوزها هو أنا قولتله روح طلقها.. خلي بالك هنا هتلاقيني بجوز وبحبب وبدلع وبهني ما بطلقش.. ده أنا بقوله روح اتجوزها فتلاقي الناس بتقولك إيه هو انتي مش عارفة إنها مراته.. مش مراته يا روح قلبي.. اعملي سيرش أو بحث هتعرفي إنها مش مراته.. مش عايز يتجوزها عشان هناك في بلده تاخد نص فلوسه لو عايزة تتطلق.. زائد بقى إيه إن أمه مش راضية في بقى رضا الأم.. ما يعملش حاجة كريستيانو أمه مش راضية عليها أمه عندها مشاكل في الموضوع ده.. بتحبها بس تيجي عند عقد الجواز وقفوا الموضوع.. يقدر يقولها يا أمي غصب عني هروح أتجوزها ما يحصلش.. يقدر يقولها طب أتجوزها بس وبعدين.. مفيش الكلام ده”.

وتابعت: “فأنا دعيت يروح يتجوز البنت.. دعوة للستر والجواز والرسالة الكويسة وبكرر رسالتي مرة تانية لكريستيانو رونالدو الحلال مفيش أجمل منه وربنا عمره ما هيكرمك طول ما انت قاعد كده مجريها وراك ومنشف دماغك في موضوع الجواز ده.. اديك شوفت ميسي أهو لما اتجوز واستقر ربنا كرمه إزاي ووصل للنهائي أهو وعامل أحسن بطولة في حياته وهو عمره كام 35 سنة لا اتخانق مع مدربه في النادي ولا مدربه في المنتخب ولا مدربه في المنتخب راح قعده في الاحتياطي وعمال يكسر في أرقام قياسية كل ماتش بعد التاني آدي ميسي”.