أثارت الإعلامية ياسمين عز، الجدل كعادتها بعد حديثها عن لقب “عانس” الذي يطلق على الفتاة التي تأخرت في الزواج، قائلة أن هذه الكلمة سوء أدب مع الله.
وقالت ياسمين، في برنامجها “كلام الناس” الذي يعرض عبر قناة “MBC مصر”: “الدين بيقول إيه الدين اسمعوا الشيوخ.. كلمة عانس أو فاتها القطار دي سوء أدب مع الله عز وجل لإن مفيش حاجة اسمها يفوت عليكي قطر.. المكتوب هيجي.. هتتجوزي جوازة غلط عشان ما يقولوش عانس.. بعدها هتصبري على جوازة غلط عشان ما يقولوش فلانة اتطلقت بمفاهيم مجتمعنا.. فمفيش حاجة اسمها عانس”.
وأضافت: “في حاجة اسمها واحدة مطولة بالها عشان تاخد سيدي الرجالة.. مفيش حاجة اسمها نفرح بيكي امتى.. في حاجة اسمها افرحوا بنفسكوا وانا هفرح بنفسي لما ربنا يريد.. الزواج كالأرزاق مقسمة اللي بتنعتك وبتصفك بهذه الكلمة البائسة ده انعكاس ليها هي لشخصيتها هي وروحها المؤذية ونفس الست اللي بتقول الكلمة دي هتلاقيها فاشلة في حياتها.. أول ما تيجي تقولك انتي عانس اعرفي انها فاشلة في حياتها لإن مستحيل الناجح في زيجته يتفوه بكلمة تجرح غيره اللي لسه ما اتجوزش”.
وتابعت: لما تيجي طنط تقولك إيه يا حبيبتي ما اتجوزتيش ليه؟ قوليلها معلش أنا خايفة أطل أغطي ع الكل.. قوليلها كده.. والست اللي زي دي اللي قاصدة تأذيكي المخربة المعقدة تعامليها معاملة القنفد.. يقولك إيه القنفد لا يتحضن ولا يتباس.. يعني لا تسلمي عليها ولا تحضنيها ولا تتعاملي معاها ولا تيجي جنبها تجاهليها.. اعتزل ما يؤذيك عشان ما تسمعيش كلمة تؤذي روحك وتؤذي نفسك.. مفيش حاجة اسمها عانس ومفيش حاجة اسمها بايرة دي كلمة فيها سوء أدب مع الله.
