ياسمين عز: أنا إجازة لمدة شهر مش عشان أصيف وأتفسح.. لأ عشان أحضر لك فقرات حلوة تطبقيها مع جوزك الفرعون

أعلنت الإعلامية ياسمين عز، خلال أحدث حلقات برنامجها “كلام الناس” الذي يعرض عبر قناة “MBC مصر” عن حصولها على إجازة لمدة شهر كامل.

حيث قالت: “كلام الناس من بكره إحنا إجازة لمدة شهر.. إجازة لمدة شهر زي كل سنة شهر أغسطس بناخد إجازة فماتزعليش يا مدام وما تاخديش على خاطرك يا آنسة أنا ببقى عارفة إن الموضوع صعب عليكوا لإنكم خلاص ما بقيتوش تقدروا على غيابنا بس الموضوع كله 30 يوم وهيعدوا بسرعة وربنا يخلي لنا شاهد وحلقات شاهد عليه كل الحلقات بتاعت كلام الناس عايزاكي كل يوم الساعة 6 مساءً تفتحي شاهد وتختاري الحلقة اللي تعجبك وتقعدي تتفرجي عليها خصوصًا الحلقات بتاعت التعامل مع الفرعون.. أو بلاش الساعة 6 شوفيها قبل ما تنامي.. قبل ما تنامي شوفي الحلقة تكون ألطف عشان أطلع لك في أحلامك يا روح قلبي.. أو لو ما شوفتيهاش هتلاقيني بتعاد على الشاشة وفي الإعادة إفادة”.

وأضافت: “يعني أنا إجازة بس هتلاقيني في البرنامج كل يوم الساعة 6 مساءً على إم بي سي مصر زي ما إحنا عارفين المواعيد خميس جمعة سبت حد أربع أيام.. شهر أغسطس إحنا إعادة.. كل سنة بناخده إجازة وده مش عشان أسافر أو أصيف أو أتفسح زي حضرتك يا مدام.. لأ خالص.. خالص أبدًا ولكن عشان أقعد أحضر لك فقرات حلوة تعجبك وأجهز لك أفكار جميلة تعمليها وتطبقيها مع جوزك الفرعون الكبير الصغير.. إجازتي الحقيقة يا مدام هي سعادتك.. وزي ما أنتي عارفة أنا مش عايزة حاجة م الدنيا دي غير إنك تكوني مبسوطة ومتهنية في بيتك مع جوزك وولادك وتكون علاقتك بحماتك وسلفتك وأخوات جوزك البنات في أحسن وأبهى صورة ممكنة.. أنا عارفة كمان إن فيه كام واحدة أو كام حد بيسمعني دلوقتي ممكن تكون مقهورة من جواها ومنهارة من الزعل والعياط عشان كلام الناس إجازة الشهر الجاي ليس حبًا في البرنامج أو لشخصي المتواضع ولكن لإنها من غير البرنامج مش هتلاقي حاجة تقولها أو تكتبها على صفحتها.. مش هتلاقي حاجة إحنا إجازة.. فمعلش يا مدام الريتش هيقع عندك شوية الكام يوم اللي جايين بس تقولي إيه بقى قضا أخف من قضا الحمد لله.. أهو الشهر الإجازة بتاعنا ده الناس هتترحم من تفلسفك”.