تحدثت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” عن مزايا الزواج للمرأة.
حيث قالت: “ليه البنت من دول لما حد يسألها هتتجوزي أمتى يا أمورة؟ أو هنفرح بيكي أمتى يا عروسة؟ تقوم مبتسمة كده ابتسامة صفرا وتقوم قايلة لهم إيه هو إيه الميزة في الجواز يعني.. أنا قاعدة في بيت أبويا مرتاحة واكلة شاربة نايمة وشارية دماغي.. إيه اللي يخليني أتجوز.. هما المتجوزين خدوا إيه.. خدوا إيه؟! خدوا حاجات كتير أوي يا روح قلبي خدوا حاجات كتير في الحصة وانتي غايبة ما تعرفيهاش”.
وأضافت: “أقولك يا روح قلبي إيه الميزة إنك تكوني متجوزة شوفي فخامة اللقب.. متجوزة متزوجة عشان ما نسمعش منك الجملة دي مرة تانية.. مبدئيًا كده لو انتي متجوزة وبتكلمي صاحبتك في التليفون هتقولي لها إيه.. اقفلي بسرعة عشان فرعوني جوزي تاج راسي وصل البيت.. زي ما علمتك قبل كده مفيهاش جدال.. لكن لو مش متجوزة هتقوليلها ايه؟ اقفلي عشان ماما بتنده عليا عشان أروح أشطب المطبخ وأغسل المواعين”.
وتابعت: “خدي عندك الميزة دي كمان.. لو ما اتجوزتيش بمزاجك هتفضلي طول عمرك عايشة باسم واحد.. يعني مثلًا لو اسمك دنيا.. هتفضلي طول عمرك كده دنيا عادي.. دنيا بدون أي إضافات.. دنيا بس.. ولكن بعد الجواز هيبقى عندك أسماء كتير.. عدي بقى.. هتبقى فرحانة وفخورة بنفسك وانتي بتسمعيها.. يعني غير دنيا.. هتبقي مثلًا.. حرم أستاذ محمد أو قرينة أستاذ محمد أو مدام محمد أو تاخدي لقب عيلة جوزك مباشرة.. فتبقي مثلًا اسمك إيه مدام عبد السميع.. مدام عبد الجليل.. مدام عبد العظيم.. بعد شوية بإذن الله تحملي وبطنك تكبر وربنا يرزقك وتخلفي ولد مثلًا تسميه عبد الرحمن فتاخدي اسم كمان زيادة اضافة.. تبقي أم عبد الرحمن أو أم بودي”.
وأكملت: “ولكن يبقى أحلى وأجمل اسم ليكي هتسمعيها في حياتك كلها هي لحظة ما تكونوا خارجين انتي وفرعونك في مكان ما أو ماشيين في الشارع وجوزك فرعونك حبيبك يندهلك في الشارع ويقولك يا محمد.. أحلى لحظة حاجة قمة الرومانسية والله.. بينده لك باسمه هو ليه بقى؟ يقولك يا محمد أو يا أحمد.. خلي بالك هنا سمعتي حرف الدال الآخر أنا شددت عليه.. ليه بيقولك يا محمد.. دي استعارة مكنية في غاية البلاغة الحقيقة.. لإنه لما ينده في الشارع باسمه هو بيبقى عايز يقولك بطريقة غير مباشرة إن أنتي نفسه وحتة منه.. وإن انتوا خلاص بقيتوا شخص واحد.. روح واحدة في جسدين”.
