دافعت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” عن النجم تامر حسني، بعد الهجوم الذي تعرض له من قبل البعض، عقب طرح فيلمه الأخير “تاج” في السينمات.
حيث قالت ياسمين: “ما عندناش في مصر إلا فنان واحد شامل في الجيل ده.. تامر حسني.. معندكش تاني خلي بالك.. يعني مين المطرب المغني.. والمطرب المغني أنا قاصدة أقولها كده.. المطرب يقول طرب والمغني يغني أي لون مين قدر يعمل اللي عمله تامر حسني؟! مفيش.. بيغني وبيمثل وبيلحن ويألف هو تامر حسني بس”.
وأضافت: “فأنت عندك واحد بتكسر في مقاديفه ليه وأرجع وأقولكوا تاني قولت نفس الكلام ده على فيلم السنة اللي فاتت.. أنا مش بكبره هو صغير وبادئ صغير دخلت المدرسة وتامر حسني ناجح ومكسر الدنيا خلصت المدرسة ودخلت الجامعة كان مكسر الدنيا ونجح ومعدي الحاجات.. خلص جامعة واشتغلت شغلانتي دي مذيعة ناجح وما شاء الله عليه ربنا يزيده ويبارك له.. لحد النهارده هو مفيش سنة إحنا سمعنا إن تامر حسني قل.. تامر لا بينام ولا بياكل ولا بيشرب عشان يعملك حاجة حلوة.. فأنت دورك كمحب له إن لما يعمل حاجة حلوة تشجعه”.
وتابعت: “إنما القلة اللي بيكسروا في مقاديف أي حد ناجح المغيوظين المتغاظين والمغيوظين اللي بيتغاظوا من نجاح هذا النجم فكل مرة ينزل فيلم يعملوا نفس الحملات عليه.. لأ ستوب لن نسمح.. غير مقبول يا جماعة أي حد ناجح نهاجمه”.
