ياسمين عز: الراجل لو ما كانش ابن أمه ما يبقاش راجل.. دي القهوة لو أمك مش راضية عنها بتفور ما بالك بالجوازة؟!
أثار الإعلامية ياسمين عز، جدلًا واسعًا في الساعات الأخيرة الماضية، عقب حديثها عن مصطلح “ابن أمه” المتداول بين الفتيات، في حلقة أمس السبت، من برنامجها “كلام الناس” الذي يعرض عبر قناة “MBC مصر”.
وقالت ياسمين: “اللي تقول عليه أمك تعمله من غير تفكير.. لما تقولك البنت دي ما تنفعش يبقى ما تنفعش ما تجادلهاش وما تقاوحهاش.. هي أدرى وأعلم وأكتر خبرة منك.. وقبل كل ده عارفة مصلحتك”.
وأضافت: “عارفة مصلحتك كويس وعمرها ما تضرك انت ابنها ضناها.. ممكن البنت تكون أحلى بنت في الدنيا كويسة جدًا وكل حاجة بس أمك عندها نظرة تانية.. سبحان الله الأم دايمًا عندها قرون استشعار.. بتكون قارية المشهد من بعيد عارفة إن البنت دي لما تتجوزها هتعمل فيك إيه.. أو هتتغير إزاي بعد ما تتجوز أو لما يتقفل عليكوا باب بيت واحد ممكن يبقى الوضع عامل إزاي”.
واستكملت: فمرة تانية بقولهالك بكل أمانة كله إلا رضا الأم.. خليك عارف إنك عمرك ما هتعمل حاجة هي مش راضية عنها وهتكمل أو هتنجح أو ربنا هيبارك فيها.. يا راجل ده القهوة لو أمك مش راضية عنها بتفور وانت جنبها.. ما بالك بالجوازة؟!.. اختار اللي أمك تكون راضية عنها مش اللي انت ترضى عنها.. البنت تتعوض لكن الأم ما تتعوضش.. البنت تروح ويجي غيرها لكن الأم مفيش غيرها”.
وواصلت ياسمين، حديثها عن المقارنة بين الأم والحبيبة، موجهة رسالة لكل فتاة قائلة: “ما تحطيش نفسك في مقارنة مش في صالحك.. ما تقوليش يا أنا يا أمك.. ماما طبعًا يا حبيبتي انتي مين؟ وما ينفعش يقولك رد تاني غير كده يقولك أمي طبعًا.. بعدين تخيلي لما واحد يبيع أمه عشانك يبقى هيعمل فيكي انتي إيه شخصيًا بعد كده؟! وأنا راضية ضميرك لو ليكي أخ ترضي يتجوز بنت مامتك مش راضية عنها؟ أو انتي نفسك أخته مش راضية عنها؟”.
وتابعت: “وبعدين لما يجي يقولك مش هينفع نكمل مع بعض عشان ماما مش راضية أو مش موافقة ده مش معناه خالص إطلاقًا أبدًا إنه ابن أمه.. وتفضلي في الرايحة وفي الجاية تعايريه وتقولي ده طلع ابن أمه.. أو تقولي لأهلك وأصحابك سيبنا بعض عشان هو ابن أمه.. مبدئيًا كده إن الراجل ما كانش ابن أمه ما يبقاش راجل”.
