ياسمين عز: الدكتورة ربنا زارع في قلبها حب يساع الدنيا كلها فمش هتحبك انت يا أبو قلب رقيق وصغير

واصلت ياسمين عز، في حلقة أمس من برنامجها “كلام الناس” الذي يعرض عبر قناة “MBC مصر” حديثها عن مميزات الزواج من الدكتورة.

حيث قالت: “لما تتجوز من دكتورة عمرها ما هتشغلك بطلبات البيت.. يعني مثلًا مش هتصحى م النوم تلاقيها سايبة لك ورقة جنب السرير مكتوب فيها عايزين لبن وزبادي وعيش وفينو ومسحوق وبسطرمة والحاجات دي أبدًا.. لإنها ببساطة عارفة إن خطها ما حدش بيعرف يقراه غير الصيدلي وهي مدركة ومعترفة بالموضوع ده فبالتالي هي مش هتكتب لك ورقة انت مش هتعرف تقراها أو تفهمها فهتروح تجيب طلبات البيت بنفسها وتتصرف ودي ميزة رجالة كتير بيحلموا بيها”.

وأضافت: “وبعدين الدكتورة دي اللقب بتاعها إيه (د/) فاكر المهندسة (م/) الدكتورة (د/) أو دال بين هلالين بين قوسين مفخمين مزركشين معقمين.. لإنها دكتورة النضافة أولًا وثانيًا وثالثًا وكل شيء فلة كده بتبرق.. المثل بيقولك إيه اللي يتجوز واحدة لقبها دال شرطة أو دال بين قوسين هيلاقي كل حياته كل الدلال.. دلال من الدال.. فأوعوا تسمع اللي يقولك الدكاترة دول معقدين ومش بتوع حب ومش بتوع جواز وواهبين حياتهم للمذاكرة والعلم بس.. لأ اللي يقولك كده اسمحي لي أقولك إنك ما تعرفش حاجة.. ده الحب اتعمل أصلًا عشان الدكاترة”.

وتابعت: “الست الدكتورة زمان كانوا بيقولوا الست الحكيمة.. حكيمة من الحكمة والعلم.. هي مش دكتورة بس هي حكيمة.. زمان كانوا يقولوا لازم ناخده عند الحكيم ليه لإن الدكتور عارفين قيمته إحنا عارفين قيمته بس لازم نرجع لأيام وليالي زمان.. ده المعنى الحقيقي لكلمة احتواء.. عندها احتواء.. وبعدين دي واحدة زارع في قلبها حب يساع الدنيا كلها فمش هتحبك انت يا أبو قلب رقيق وصغير.. هتحب وتموت فيك”.