تغزلت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” في المهندسات.
حيث قالت: “يا سعدك يا هناك يا فرعون لو اتجوزت بسم الله الرحمن الرحيم كده مهندسة.. مهندسة.. فخامة الاسم.. مش هتبقى محتاج حاجة تاني من الدنيا”.
وأضافت: “عارف مصطلح ع الفرازة وبنت زي الكتاب ما بيقول أهو ده معمول عشان المهندسة.. بعدين أوعى تصدق الاشاعات المغرضة اللي بتتكتب على جروبات الجامعة وبتقولك إن بنات هندسة دول مسترجلين ولا مش حلوين لأ أحلى بنات وأكتر أنوثة ده كلام عاري تمامًا من الصحة ما تصدقهوش.. المهندسات دول يا فندم ملكات جمال.. ملكات جمال من نبت شعرهن لأخماصهن.. عارف أخماصهن ولا مش عارفها؟ أخماصهن اللي هو الصباع الصغير ده اللي ممكن تقف تصوت منه لما تتخبط في كرسي الترابيزة.. أهو بنات هندسة بقى الأخماصهن بتاع هن ده عمره ما يتخبط في الترابيزة ليه؟ لأن كل خطوة عندها بحساب.. وكل قرار بتاخده بيكون محسوب بالمازورة والملي”.
وتابعت: “باختصار كده حياتك معاها هتكون ماشية بالمسطرة.. مصروف البيت خزين المطبخ فواتيرك أقساطك وكل حاجة بالمسطرة.. بمناسبة المسطرة هقولك على ميزة رهيبة في مراتك أو في الست المهندسة مش هتلاقيها في أي واحدة تانية.. دايمًا هتلاقي حواجبها الاتنين قد بعض بالظبط.. عكمرك ما هتلاقي حاجب على شكل 8 ده ع العين اليمين.. واللي ع العين الشمال على شكل سمبوكسة لأ معندهمش كده زي ما كتير بيحصل وزي ما بنشوف عند بنات كتير اليومين دول.. خدها قاعدة كده البنت المهندسة بتتعرف من حواجبها.. بتلاقيهم مظبوطين كده وقد بعض بالظبط وبالمللي”.
