عادت الإعلامية ياسمين عز، لإثارة الجدل من جديد بتصريحاتها حول العلاقة الزوجية بين الرجل والمرأة، من خلال حلقة أمس الخميس، من برنامجها “كلام الناس” الذي يعرض عبر قناة “MBC مصر”.
وقالت: “للأسف في ستات كتير نسيوا إن الجواز ده ميثاق غليظ.. الموضوع مش سهل كده يا جماعة وكلمة طلقني دي لازم نراجع نفسنا فيها ألف مرة.. كلمة عزيزة ما تتقالش عمال على بطال ولا تتقال على ابسط الأمور والمشاكل”.
وأضافت: “إحنا بقينا دلوقتي نسمع ناس اتطلقوا بسبب شوية ملح زيادة في الأكل.. ولّا خناقة على اسم بنتهم أسيل ولّا ريماس.. ولّا مش عارف إيه ولّا إيه.. خليكي ناصحة.. خليكي واعية.. خلي عندك شخصية ما تبقيش ودانية.. ما تبقيش كلمة تاخدك وكلمة توديكي.. بلاش تسمعي كلام اللي تقولك اعملي زيي ولّا أعملي في جوزك كذا ولّا كذا”.
وتابعت: “في الآخر كل راجل له طبع مختلف عن التاني.. فحاولي أرجوكي تفهمي جوزك وطبع جوزك ومن خلاله تتعاملي مع المشكلة وكل مشكلة وتعرفي ازاي تعديها مع جوزك.. ازاي تمتصي غضبه.. ما تزعقيش وهو متعصب.. أهم حاجة صوتك دايمًا يبقى هادي وواطي.. تبقي مقتنعة من جواكي إن مهما حصل بينكم النهاية إن انتوا مالكوش غير بعض.. وتبقي عارفة إن إحنا مش ملايكة ومفيش حد فينا خالي من العيوب ومفيش بيت بيخلى من المشاكل كلنا باختلافتنا.. وبعدين والله العظيم أي خناقة مهما كانت إيه بتنتهي بعد نص ساعة كلمة حلوة حتة كيك كوباية شاي وتقعدي والدنيا تهدى”.
