تحدثت الإعلامية ياسمين عز، في حلقة أمس السبت من برنامجها “كلام الناس” الذي يعرض عبر قناة “MBC مصر” عن فوائد سكن المرأة في منزل أهل زوجها.
حيث قالت: “يا مدام ما تصدقيش اللي يقولك في مثل كده يقولك كده لو الغلة قد التبن كانت الحما تحب مرات الابن.. المثل ده مرفوض شكلًا وموضوعًا.. مثل مغرض ومش حقيقي.. وغالبا اللي طلعته واحدة ست عايشة في بيت حماتها ومتضايقة منها وحماتها كانت ست كويسة ومش راضية عن اللي هي بتعمله والمثل ده عايزين نعمل عليه إكس”.
وأضافت: “وبعدين ما تكونش مامتك مش طايقاكي في البيت أساسًا وتظلمي حماتك وتقولي إنها ما بتحبكيش.. ما انتي كنت مطلعه برضه عين مامتك.. فأدي فرصة لحماتك تحبك وتحبيها.. اكسبيها.. خليها دايمًا في صفك.. الكلمة الطيبة صدقة.. انتي عارفة إن انتي الودن اللي حماتها بتفضفض لها وتحكي لها أسرارها دي حاجة كبيرة جدًا.. عارفة يعني إيه تكسبي رضا وقلب حماتك.. يبقى طاقة القدر اتفتحتلك حياتك هتبقى جنة والحاجة قبل ما تطلبيها بالعين هتلاقيها.. قوليلي ده هيحصل فين لو ما كنتيش مقيمة معاها وقاعدة معاها 24 ساعة في اليوم في بيت جوزك”.
وتابعت: “نفس الكلام مع اخوات جوزك.. مع العشرة والأيام هتطبعوا وتولفوا على بعض.. وتحبيهم ويحبوكي زي أخواتك بالظبط.. ومش هيبقى فيه حاجة اسمها عمتو الحرباية.. مفيش عمتو الحرباية.. لإن انتي دايمًا عندك مشاكل مع عمتو وخالتو.. مفيش حاجة اسمها كده في إن عمتو أخت بابا وزي أختي بالظبط.. وخديها قاعدة إن اللي ما تعاملش أخت جوزها زي أختها يا تعاستها وميلة بختها.. المثل ده مخصوص عشانك.. وأهم ميزة إنك تتجوزي وتعيشي في بيت أهل جوزك إن ولادك مش هيحسوا بالوحدة ولا يطلعوا معقدين.. ولادك هيبقوا عشريين ومش هيخافوا من الناس.. ومش بعيد يتكلموا من وهما عندهم 3 شهور تلاقي الولد من كتر الناس والزحمة بقى حاجة كده عبقرية حاجة غريبة.. الطفل المعجزة اتكلم وهو عنده 3 شهور عشان قاعدة في بيت أهل جوزك”.
