قدمت الإعلامية ياسمين عز، عبر حلقة أمس السبت من برنامجها “كلام الناس” الذي يعرض عبر قناة “MBC مصر” الوصايا العشر للتعامل مع الزوج الأهلاوي قبل مباراة فريقه أمام الوداد المغربي في نهائي دوري أبطال إفريقيا.
حيث قالت: “طبعًا زي ما انتوا عارفين لما بيكون فيه ماتش مهم.. نهائي بطولة كبيرة زي ماتش الأهلي والوداد البيوت بتكون مكهربة والرجالة بتكون متوترة وعلى أعصابها وده شيء إحنا ما بنحبهوش.. ولإني بحبك وعايزة مصلحتك هقولك على الوصايا العشر للتعامل مع جوزك الأهلاوي قبل الماتش”.
وأضافت: “أول حاجة بلاش أكل دسم والغدا يكون خفيف عشان يقدر يشجع وهو في كامل طاقته ونشاطه وشوفي كنتي طابخاله إيه ع الغدا يوم ماتش الترجي اللي فات وأعمليهوله يوم ماتش الوداد من باب إيه بقى من باب نشر البهجة وروح التفائل في البيت قبل الماتش.. حاجة تانية كتري في اليوم ده من المصطلحات اللي تفكر جوزك بالبطولات اللي فاتت.. يعني لما يخلص صلاة مثلًا قوليله الأرض لا تنسى جباه الساجدين”.
وتابعت: “حاجة تانية.. أنا من أنصار صينية البط بالبرتقال وبشجعك إنك تعمليها لجوزك بس الأسبوع ده بلاش بط بالبرتقال.. وبلاش تكوني بتتصوري سيلفي ولا حاجة تقومي مصدراله بوز البطة.. وبلاش كمان عقلك يهفك وتتصوري إن دمك خفيف وتقوليله واك واك.. عشان البطة والواك واك دول من الرموز المميزة لنادي الوداد.. فبالتالي خلي بالك وأوعي تعملي كده”.
وأستكملت: “لو جوزك وتاج راسك فرعونك من النوع العصبي يستحسن تشيلي أي أدوات قابلة للكسر في محيط الـ 20 متر اللي حواليه والشاي وقت الماتش يكون في كوبايات الكرتون.. لإن الواحد ما يضمنش رد فعله تحديدًا بعد أي فرصة لطاهر أو عبد القادر ما تعرفيش إيه اللي ممكن يحصل.. أهم حاجة أعملي إن مامتك واحشاكي أوي قبل الماتش ومش راجعة غير بعد الماتش.. وياسلام لو تباتي عندها وترجعي الصبح.. هيكون أحسن كتير ليه وليكي ولينا كلنا”.
وأردفت: “خلي في التلاجة اليوم ده حاجة حلوة وحاجة حادقة ضروري.. لإن الماتش صعب وذكريات آخر بطولة مع الوداد ما كانتش كويسة.. فممكن لا قدر الله تجيله كومة سكر أو بعد الشر عليه وعلى حواليه ضغطه يعلى فتكوني مأمنة نفسك لإن محدش ضامن الظروف ولا ضامن الكورة والكورة مالهاش آمان.. لو لاقيتيه ساكت وقاعد سرحان ومسهم بلاش الأسئلة المستفزة بتاعت أنت بتفكر في واحدة تانية غيري.. لإن لو كان حتى في الأيام العادية بيفكر في واحدة تانية غيرك الأسبوع ده تحديدًا مش هيكون في دماغه حاجة تانية بيفكر فيها غير مين اللي هيبتدي مكان الشناوي.. على لطفي ولا شوبير”.
واختتمت حديثها قائلة: “الماتش معروف معاده من شهر.. فمحبكتش عزومات في اليوم ده خصوصًا لو ناس قرايبك هو مش بيحبهم أو ليه ذكريات وحشة معاهم ما تديلوش فرصة أو أي مجال للتلكيك في حالة لا قدر الله نتيجة الماتش ما طلعتش زي ما هو عايز مالهاش لازمة أبدًا تنفيض البيت اليوم ده.. حبيبة قلبي علامة مج النسكافيه لازقة في الكمودينو اللي جنبك بقالها 3 تيام مفكرتيش تقومي تمسحيها فإحنا مش هنضحك على بعض وجو مدام نظيفة اللي ممكن تعمليه اليوم ده.. ده مش مستحب خالص”.
