ردت الإعلامية ياسمين عز، خلال حلقة أمس الجمعة من برنامجها “كلام الناس” الذي يعرض عبر قناة “MBC مصر”، على الشائعات التي انتشرت عنها مؤخرًا.
حيث قالت: “من سنتين كده أول ما بدأنا البرنامج بدأ يطلع عليا كل يوم كيلو إشاعات ولإني مقفلة كتاب (فن اللامبالاة) تقريبًا سبع مرات فآخر همي إني أرد أو أبرر أو أشرح.. فبعد سنتين النهارده ممكن أرد كده على إشاعة جالي مزاج إني أرد عليها بعد سنتين”.
وأضافت: “من سنتين بقى كان فيه إشاعة.. كان فيه فيديو منتشر ليا بغني فيه أغنية لسميرة سعيد ولابسة فيه فستان أزرق.. وحد كده من الحدود كان ممغوص مننا أو غيران مننا كالعادة قام مطلع إشاعة إيه إني كنت مغنية وما كملتش أو مطربة أو حاجة كده.. الحقيقة إني عمري ما كنت مغنية ولا هكون مغنية ولا هغني.. الحاجة الوحيدة اللي ممكن أغنيلها هي فرعوني تاج راسي.. فقط لا غير والغنا الوحيد اللي انتي كمان تغنيه يا مدام هو جوزك حبيبك تغنيله صباح النور ع البنور لما يزقزق العصفور”.
وتابعت: “ده غير إن أنا صوتي لا يصلح للغناء.. صوت شتوي.. الغنا ده عايز صوت صيفي طبقات عالية.. فبالتالي عمري ما أفكر أغني ولا عمري غنيت لإني لازم أحافظ على أحبالي الصوتية أوفرها هنا ليكي وللبرنامج.. ولكن بقى إيه قصة الغنا والفيديو ده من خمس سنين تقريبًا تم دعوتي لمحطتي الحبيبة (MBC مصر) عشان أكون ضيفة في برنامج اسمه (HIT الموسم) تقديم الفرعون النجم اللي معانا النهارده طبعًا النجم أحمد فهمي.. المطرب والممثل.. وكان معانا ضيوف تانيين كانوا مذيعين من المحطة وكنا في الحلقة دي بنغني ونلعب ونجاوب أسئلة ونكسب نقط وكان مطلوب من كل ضيف يغني أغنية سواء كان صوته شتوي أو صيفي مش مشكلة ده برنامج ألعاب يعني وهنا يعني أحب أفاجئكم أنا مش غنيت أغنية واحدة أنا غنيت أغنيتين واحدة للديفا سميرة سعيد وواحدة لسيرين عبد النور”.
