ياسمين عز لمتابعة تسأل “أعمل إيه لو شوفت جوز أختي ماسك إيد واحدة؟”: ممكن تكون ست نظرها ضعيف وبيوصلها
ردت الإعلامية ياسمين عز، على أسئلة الجمهور خلال حلقة أمس الجمعة من برنامجها “كلام الناس”، الذي يعرض عبر قناة “MBC مصر”.
حيث قالت: “مروة باعتة تقولي إيه.. مكنتش أتخيل إني كنت ممكن ألجأ لك في يوم من الأيام.. ده من أصلك والله يا مدام مروة.. بس عارفة إن مفيش حد هيساعدني في الموضوع ده قدك.. شكرًا طبعًا على ثقتك الغالية”.
وأضافت: “بتقول إنها كانت ماشية في مول بتعمل شوبينج وطبعًا هنا عايزة أقولها ادعي للفرعون الكبير الصغير اللي مش حارمك من حاجة.. بيديكي فلوس أو كريدت كارد تعملي شوبينج المهم بتقول إنها لقت جوزها.. أو هي بتقول لقيت جوز أختي ماشي مع واحدة ومشبك صوابع إيديه في إيديها وبتقول أنا اتمسمرت في مكان مبقتش عارفة أعمل إيه ولغاية النهارده مش عارفة أقول لأختي ولا أعمل إيه ولا اتصرف إزاي وقولت أبعتلك وأشوفك هتنصحيني بإيه”.
وتابعت: “بصي أنا مش عارفة انتي عايزة تعرفي نصيحتي بجد ولا ده فخ انتي عايزاني أرد.. أنا هرد رأيي الخاص.. بصي يا مروة.. مبدئيًا كده شكلك مهندسة ديكور ليه بقى لإن مصطلح اتمسمرت في مكاني ده ما يطلعش غير من واحدة شغالة في شركة مقاولات أو بتحب الخشب أو شغل النجارة مثلًا فأحسن حاجة عملتيها في الرسالة انك ما قولتيش لأختك على اللي حصل وسخنتيها على جوزها أو خليتيهم يتخانقوا سوا لإن ضميرك كان هيفضل مأنبك طول عمرك يا مدام مروة”.
وأستكملت: “تسأليني ليه بقى أقولك ليه.. مش يمكن أختك هو كمان شافت جوزك قبل كده في نفس الوضع مع واحدة تانية وما قالتلكيش شوفي بقى شوفي منظرك كان هيبقى عامل إزاي قدامها؟ هي خافت عليكي وفضلت كاتمة وقافلة على قلبها ومارضيتش تقولك ولا تحكي لك عشان ما تخربش بيتك وانتي في ساعتها كده عايزة تروحي تحكي لها وزي ما تقولي كده جنازة تشبعي فيها لطم.. عين العقل إنك ما حكيتلهاش اللي حصل لإنك مش هتستفيدي حاجة.. هتستفيدي إيه يعني لما تتخانق مع جوزها ولا تطلق.. ده غير إنك كمان ما تضمنيش رد فعل أختك.. ممكن تقول أنا واثقة في جوزي وعمره ما يعمل كده.. وانتي تلاقيكي غيرانة مننا عشان جوزك ما بيحبكيش زيه”.
وأردفت: “وبعدين يا مدام مروة انتي ليه واثقة أوي إن جوز أختك بيخونها مش يمكن اللي شوفتيها معاه دي خلينا نفترض حسن النية.. ممكن تكون ست نظرها ضعيف وهو كان ماسك إيديها عشان يوصلها للمحل اللي عايزة تروحه ع الناحية التانية”.
