وجهت الإعلامية ياسمين عز، خلال حلقة أمس السبت، من برنامجها “كلام الناس” الذي يعرض عبر قناة “MBC مصر” رسالة إلى إحدى الفنانات الشابات دون ذكر اسمها.
وتوقع البعض أنها تقصد الفنانة الصاعدة مايان السيد، التي ردت على سؤال حول رأيها في تصريحات ياسمين عز، قائلة: “لا تعليق.. مش عايزة أساعد إنها تشتهر.. مش هتكلم عنها” وذلك على هامش المؤتمر الصحفي لفيلمها الجديد “هاشتاج جوزني”.
وقالت ياسمين، في رسالتها الموجهة للفنانة الشابة:”أنا هختار أرد بالأدب لإني ما بحبش قلة الأدب مع إن مفيش أسهل منها.. لما تكوني لسه مبتدئة في حياتك المهنية وبتمثلي في بداية حياتك ولسه بيكتبوا اسمك بالقلم الرصاص.. حاولي ما تخوضيش معارك مجانية.. ما تخلقيش لنفسك عداء بدون داعي ببلاش”.
وأضافت: “مش ذنبي إن الصحفي مالقاش عندك تاريخ مهم أو حاجة مهمة يسألك عنها فسألك عني.. ده مش ذنبي.. وبدل ما تتكلمي عني كنتي طلبتي بكل احترام وتهذيب إن الناس تسألك عنك انتي وعن شغلك انتي مش عني أنا.. انتي بنت ظريفة حاولي إن انتي تشتغلي على نفسك أكتر.. تعملي أدوار مهمة وحلوة.. وتصنعي تاريخ مهم يخلي الصحافة المرة الجاية تسألك عنك انتي مش عني أنا”.
وتابعت: “شوفي هقولك حاجة.. إحنا مش ملزمين نحب بعض.. بس مجبورين نحترم بعض.. فأحمدي ربنا والحمد لله إن ربنا وقعك فيا المرة دي.. أنا عمومًا ما بردش خالص.. نادرًا لما برد مرة أو اتنين.. مرة تانية ممكن تقعي مع حد تاني يستلمك ليل نهار”.
