ياسمين عز تمدح المرأة المصرية لأول مرة: من غيرك الأكل ما يحلاش واللمة ما تبقاش واللي يقول غير كده يبقى لا كان ولا عاش

قدمت الإعلامية ياسمين عز، في حلقة أمس الأحد من برنامجها “كلام الناس” الذي يعرض عبر قناة “MBC مصر” وصلة غزل ومدح في المرأة المصرية.

حيث قالت: “انتي هيجي عليكي رمضان الدنيا حر عرقانة حرانة زهقانة شعرك أرايل واقفة.. بتدعي الآدان يدن.. لابسة الروب أو الجلابية أو البيجامة أو أي حاجة واسعة عندك بتحمري البطاطس والبانيه الزيت بيطشطش في وشك وفجأة الطاسة بتفاجئك بطشطوشة كبيرة بتنط في وشك برضه وبتجري مش عارفة تعملي إيه ولا إيه”.

وأضافت: “يدن الآدان تجري تديهم كلهم مية وتمر وبلح وتين علشان يكسروا صيامهم وانتي يا حبيبة قلبي بتبلي ريقك آخر واحدة.. دايمًا ناسية نفسك ومفضلاهم عليكي وعلى قلبك زي العسل ليه بقى؟ لإنك أم وست وجبل ولولاكي رمضان والله ما يكون ليه طعم ومن غيرك الأكل ما يحلاش واللمة ما تبقاش واللي يقول غير كده يبقى لا كان ولا عاش”.

وتابعت: “أنا عارفة إن دي أول مرة في حياتي أغازلك وأعاكسك لذلك أنا حسيت إن أنا هدمع بس أنا مش بعاكسك أنا بقولك الحقيقة بقول الحقيقة لكل أم انتي اللي بتشيلي الدنيا على دماغك من أول يوم رمضان لآخره وانتي اللي بتشيلي العيال وأبوهم الفرعون وانتي اللي بتأكلي وتشربي وتلمي وتهتمي وعلشان كده والله صدقيني الفرعون عمره ما يستغنى عنك ولا ينفع يلاقي ضفرك بره”.