ياسمين عز: سؤال “أعملك إيه ع الفطار؟” غلط.. المفروض أعملك إيه يا حبيبي يا نور عيوني يا فرعوني يا مأكلنا يا مشربنا

طالبت الإعلامية ياسمين عز، النساء بعدم توجيه السؤال المعتاد “أعملك إيه ع الفطار” لأزواجهن في رمضان، وذلك خلال حلقة أمس السبت، من برنامج “كلام الناس” الذي يعرض عبر قناة “MBC مصر”.

حيث قالت: “في رمضان السنة دي حاولي تحذفي من قاموس مفرداتك اليومية السؤال اليومي المعتاد بتاع أعملك إيه ع الفطار؟ السؤال ده غلط.. أولًا الصيغة غلط المفروض أعملك إيه يا حبيبي يا نور عيوني يا فرعوني يا مأكلنا يا مشربنا يا مدفينا يا مهنينا ع الفطار؟ شوفي هو ممكن ينسى عايز ياكل إيه بعد وصلة الشعر دي”.

وأضافت: “تعملي أي حاجة يا حبيبتي هو هياكلها وبعدين عيب عليكي بعد كل السنين والعشرة دي ولغاية النهارده مش عارفة هو بيحب ياكل إيه وما بيحبش إيه”.

وتابعت: “وبعدين هو انتي عمرك عملتي أكل أصلًا والراجل اعترض عليه.. ده بيجي الأكل محروق وناقص ملح وأحيانًا رزك معجن ورغم كده حبيب قلبنا بيكتم في قلبه وياكله وما يرضاش يحرجك وفوق كل ده بيقولك تسلم إيديكي يا حبيبتي ربنا يخليكي لينا يا حبيبتي.. طب قوليلي عايزة إيه تاني من الدنيا أكتر من كده انتي رزك معجن وهو بيدعيلك.. مفيش منه لفي ودوري زي المروحة مش هتلاقي زيه”.