ياسمين عز: وإيه يعني الأخت تعمل لأخوها كوباية الشاي؟.. تخيلت إنك هتقولي ده أنا أجيب له جرس يرن بيه فأجري أعمل الشاي

أثارت الإعلامية ياسمين عز، جدلًا واسعًا بسبب تصريحاتها بشأن العلاقة بين الأخ والأخت، وخدمتها له في المنزل، مما عرضها للانتقادات اللاذعة من قبل رواد مواقع التواصل الاجتماعي.

وعلقت ياسمين، في حلقة أمس الخميس، من برنامجها “كلام الناس” الذي يعرض عبر قناة “MBC مصر” على الانتقادات التي وجهت لها بسبب تصريحاتها الأخيرة، قائلة: “من كام يوم اتكلمت عن قصة كوباية الشاي وهل من حق الأخ على أخته لما يطلب منها تعمله كوباية شاي إنها تقوم تعملهاله ولّا لأ.. واتكلمت في الموضوع ده من هنا روحت البيت الدنيا اتقلبت”.

وأضافت: “لدرجة إن كوباية الشاي بقت من ضمن الكلمات الأكثر بحثًا على جوجل خلال الأيام اللي فاتت.. والحقيقة وزي ما حضراتكم عارفين أنا ما بتكلمش غير في الأصول.. واللي بقوله قدامكم على الهوا والله العظيم هو اللي بعمله في بيتنا.. لا مضطرة أذوق الكلام ولا أغير قناعاتي عشان أرضي حد معين مع إن والله أريحلي وأسهلي وأسهل حاجة في الدنيا إن أنا أعمل كده.. وزي ما بيقولوا كده بالشعبي أريح الزبون بس أنا ما بعملش كده”.

وتابعت: “عايزة أعرف إيه المشكلة لما أقول إن الأخ أو الولد من حقه على أخته إنه لما يطلب منها كوباية شاي تقوم جري تعملهاله.. إيه الغريب في الكلام ده يا جماعة؟ ده أنا بنيتي الصافية وقلبي الأبيض لما كنت بقول بكل تلقائية وعفوية الكلام جاب بعض فبقول وإيه يعني الأخت تعمل لأخوها كوباية الشاي والله تخيلت إنك هتقوليلي يا ياسمين ده أنا لو أطول أجيب له جرس لو رن بالجرس كده أجري أجيب له الشاي”.

واستكملت: “معروف الأخ حبيب أخته.. والأخت يقولك دي أمه الصغيرة.. مامته الصغيرة.. العلاقة فيها محبة مفيش جدال عليها.. أنا بتكلم على مبدأ التعاون يكون في البيت مفيش أنانية.. لما تعمليله انتي كوباية الشاي هو كمان هيعملك.. هو ده اللي بينزل يجيبلك الشيبسي من تحت.. هو ده اللي بيرجعك م الدرس لو انتي متأخرة بالليل.. هو ده اللي لو انتي متجوزة بيوصلك انتي وولادك وانتي ماشية من عندهم لبيت جوزك.. هو اللي بيعملك كل حاجة”.