دافعت الفنانة وفاء عامر، عن الإعلامية ياسمين عز، خلال لقائها معها في أولى حلقات الموسم الأول من برنامج “كلام الناس” الذي يعرض عبر قناة “MBC مصر”.
حيث قالت وفاء: “ياسمين عز مش ضد المرأة.. ياسمين عز مع العمار.. ياسمين عز مع إن بيت يتبني.. ياسمين عز مع الست طويلة البال.. مع الست اللي إحنا اتربينا وطلعنا لقيناها.. آه تاخد حقها خلقت من هنا من الضلع قريب من القلب كان ربنا قادر يخلق الست من رجل الراجل عشان يدوس عليها لكن ياسمين عز مع إن الست لما تحترم الراجل أكيد هو كمان هيحترمها.. لما يكون لها هو الملك أكيد هيستحق ملكة.. لما يكون أمير يبقى يستحق أميرة.. لكن مش خالص أنا متأكدة إن مش قصدك إن طول الوقت يبقى فيه إهانة للمرأة.. إحنا عايزين نعمر.. إحنا ضد إن يبقى فيه طلاق.. إن يبقى فيه تفسخ مجتمعي ويبقى فيه عش مهجور أو بيوت مهدومة”.
وأضافت: “يعني هو ده أنا زي ما حسيت بيكي بالظبط وإحنا ما اتكلمناش قبل الحلقة والله العظيم.. أنا بشكرك إنك بتوضحي موقفك لإن ده فعلًا المقصد اللي دخل قلبي أنا.. أما بقى أي حد يتنمر أو أي حد يستعد للهجوم على حد بيبني فهنفضل نبني وهنفضل نقول معلش للست إزاي تعامل جوزها إزاي تحتضنه إزاي لو هي قالتله كلمة حلوة يبقى هو عايز يرضيها إحنا برضه الراجل له قوامة قوامة في كل حاجة.. شجاعته قوامة إحساسه بالمسئولية قوامة.. إيفاقه قوامة.. فلما يجي نحتضن كل ده وتبتسم في وشه وزي ما انتي قولتي تقوله دوس على السينيه يا سي محمد اعمل اللي انت عايزه يا سي علي.. فأكيد هتنتزع منه كل الحاجة الوحشة اللي جواه”.
وتابعت: “كملي انتي بقى لإن أنا بجد عاجبني أوي إن الموقف اتوضح بشكل غير مباشر.. نبطل نتنمر ونفهم بس.. أنا مش بدافع عنك بالمناسبة بس بقول اللي وصلني أنا كسيدة مش كفنانة”.
