كشفت الفنانة وفاء عامر، حقيقة وجود خلافات بينها وبين الفنانة منة فضالي، وذلك خلال لقائها في برنامج “كلام الناس” الذي تقدمه الإعلامية ياسمين عز، ويعرض عبر قناة “MBC مصر”.
حيث قالت وفاء، ردًا على سؤال مقدمة البرنامج بشأن استبعادها من أحد المسلسلات بسبب منة فضالي: “أولًا محدش يقدرني يستبعدني غير ربنا سبحانه وتعالى والشغل ده رزق.. والكلام ده أنا أول مرة أسمعه”.
وأضافت: “يعني الكلام اللي هي كانت بتقوله في أحد البرامج ده كان عليا أنا؟!.. غريبة.. ما يتهيأليش ده خالص لإن لو حتى من الشرف ومن الأمانة ومن الدين إن أنا ما استبعدش حد ده أنا أساعده إنه ياكل عيش ويفتح بيت ربنا يزيدها ويكرمها ومش تستبعدني تستبعد كل الزملاء”.
وتابعت: “بس هقولك على حاجة بجد لو هي استبعدتني حتى في عمل هي فيه يبقى شكرًا ليها ده أنا كاتبة عنها والله العظيم في (جعفر العمدة) عجبني المسلسل كله فكتبت عنها في (جعفر العمدة) إنها من الممثلات اللي عاملين خطوة حلوة جدًا مع سامي لإنه مسلسل حلو.. ومش هغير رأيي”.
وأردفت: “أنا ما سمعتش هي لازم تطلع تصرح عشان أرد.. ما أعتقدش إنها تقدر تقول كلام زي ده أصلًا.. كان فيه كلام وصل للمخرج أيام مسلسل (الملك فاروق) والراجل الله يرحمه كان أخوه موجود على قيد الحياة.. قالي أنا آسف صدقت.. بس معتقدش إنه منها الله أعلم من مين.. أنا مش هقدر أظلم حد”.
واستكملت: “أحسن حاجة إن الواحد يبقى عارف قيمة نفسه وعارف مقدار فنه وعارف إن مفيش له بديل.. يعني كلمة صعبة أوي يا ياسمين.. وهي ممثلة كويسة.. أنا عمري ما أعيب فيها وأكيد هي مش قصدها.. أكيد لو قالت كده أكيد هي مش قصدها أكيد قالته بشكل تاني.. إحنا في الوسط الفني بنحترم بعض والناس الأكاديميين اللي اتربوا على إيد أساتذة كبار زي الأستاذة الدكتورة سميرة محسن والدكتور جلال الشرقاوي والدكتور سعد أردش اللي درسوا المسرح العالمي اللي قعدوا جنب بعض احنا اتعلمنا يعني إيه نحترم الزميل اللي قاعد جنبي”.
