والد ريم طارق طليقة حسن شاكوش: لا أنا ولا بنتي هينفع نقول السبب.. واللي ربنا بيستره مينفعش إحنا نفضحه

كشف طارق السيد، والد ريم طارق طليقة مؤدي أغاني المهرجانات حسن شاكوش، كواليس انفصال ابنته.

حيث قال والد ريم طارق، في مداخلة هاتفية في حلقة أمس من برنامج “90 دقيقة” الذي تقدمه الإعلامية بسمة وهبة، ويذاع عبر قناة “المحور”: “أنا مش حابب أتكلم في أي حاجة عشان موضوع إن فيه حد مسيطر ع السوشيال ميديا وبيدفع فلوس لناس عشان يستغل السوشيال ميديا ضدنا ويشهر بينا الموضوع ده صعب علينا لكن أنا هقول لحضرتك على حاجة.. أنا بنتي فعلًا أتظلمت ظلم كبير.. كبير أوي ودايمًا بتهدد والكلام ده قولته من حوالي شهرين في أول المشكلة كان بيجيلي تهديدات غير عادية وطلعت استنجدت وقولت يا جماعة أنا بتهدد والراجل ده بيقول إن هو فوق القانون وإن هو يعرف يعمل ويعرف يعمل”.

وأضاف طارق السيد، في مداخلته بالحلقة التي حلت فيها ابنته ضيفة على مقدمة البرنامج: “ناس كان بيدفع لها فلوس وصور بتتعمل وحاجات عني وعن بناتي وحاجات كده يعني هقول لحضرتك كلام مش فينا وبنتي مش هينفع تقول إيه السبب وأنا مش هقدر أقول السبب لحضرتك.. يعني إحنا اتربينا إن إحنا ما نجيبش سيرة حد وما نفتش أسرار حد ولا نقول على حد حاجة اللي ربنا بيستره مش معقول إحنا هنفضحه يعني.. فموضوع إن إحنا نقول السبب الرئيسي ده خارج المناقشة”.

وتابع: “أنا بس عايز أوجه له رسالة.. أنت جيت خدت بنتي من بيتي وبنتي فرحت بيك وكانت متعززة في بيت أبوها ومبسوطة في بيت أبوها وعايشة في بيت أبوها.. رجعتهالي أبسط ما يقال عنها إنها كانت جثة مهلهلة مطعونة في كرامتها.. الله يسامحك يا أستاذ حسن على كل اللي أنت عملته وكل اللي أنا بطلبه من أي حد في مصر أي جهة حكومية أي حد له علاقة بالموضوع تقف جنبنا في الحرب اللي إحنا استنزفت كل قوانا لكن إحنا مكملين استنزفت قوانا”.