رامي جمال لعمرو مصطفى: لسه مين ما زعلتوش؟ والأخير يرد: لو شوفتك في أي مكان ههزئك

رد المطرب رامي جمال، على تصريحات الملحن عمرو مصطفى، المثيرة للجدل والتي تسببت في غضب زملائه الفنانين.

وخلال لقائه مع الإعلامية أسما إبراهيم، في أحدث حلقات برنامج “حبر سري” الذي يعرض عبر قناة “MBC مصر” رد على تصريح سابق للملحن عمرو مصطفى قال فيه “أنا المبدع والمطرب أداة”، بأنه ليس مع هذه المقولة.

حيث قال: “طبعًا لأ أعوذ بالله.. مفيش حاجة في الدنيا نجاحها بيتوقف على شخص.. الملحن من غير شاعر شاطر أداة.. الملحن ده من غير موزع شاطر أداة.. المطرب الشاطر اللي هو سماه أداة ده الفاترينة اللي من غيرها ما كانش هيبقى قاعد قدامك بيتكلم إن هو ملحن شاطر.. ففي الآخر.. بصي في نوع من النرجسية أنا مابحبوش.. يعني في فرق بين إنك عبقري وواحد من الملحنين العباقرة اللي التاريخ مش هينفع ينكرهم لكن لسه مين ما زعلتوش؟ ما عادش.. معتقدش عنده حد خلاص كفاية.. عاب في كل زمايله وانت بتعيب في زمايلك انت بتعيب في مهنتك لإن لو زمايلك معيوبين مهنتك معيوبة.. فأنا شايف إن نكبر بعض أحسن”.

وأضاف: “أنا على فكرة عارف إن من جواه أطيب من الطيابة لكن في الآخر اللي بيشوفوا مشاكلنا الناس العادية.. ليه تصدر لهم إن إحنا ما بنحبش بعض.. في الحقيقة رزقك بتاعك.. رزق رامي بتاعه.. رزق عمرو دياب بتاعه.. فكل مراكبنا ماشية لو ربنا عايزها تمشي.. مش لو انت فيها.. ما هو أي مركب انت نزلت منها ماشية وبتعوم وطايرة زي ما هي”.

ورد عليه الملحن عمرو مصطفى، من خلال منشور كتبه عبر حسابه الرسمي على موقع التواصل الاجتماعي “فيس بوك”، قال فيه: “هو أنا أترككم تتعدوا بشكل غير قانوني على ألحاني يعني ولحن تم غنائه في برنامج علي الهواء خدته وعملت منه أغنية وصورتها وفي الأخر طالع تقول عليا نرجسي.. نحن في زمن يصدق فيه الكاذب ويكذب فيه الصادق”.

وأضاف: “أقسم بالله لو شوفتك في أي مكان أنت وأشكالك لن تجدوا مني غير نظره احتقار.. وأوعي تجري تسلم عليا زي ما عملت قبل كده علشان ههزئك وأوعي تجيب اسمي تاني في مكان علشان هقاضيك انت وكل اللي شبهك مطربي الدرجة (الخامسه) زمن الرويبضه”.