“أنا كفنانة حساسة فيما يخص السوشيال ميديا”.. علا غانم عن أزمتها مع طليقها: «مُحاطة ببعض الأكاذيب وعايشة فيلم غريب»
كشفت الفنانة علا غانم، كواليس أزمتها مع طليقها رجل الأعمال المعروف عبدالعزيز حسن، وأشارت بأنها قامت بإتخاذ أول خطوة نحو استعادة منزلها.
وأكدت الفنانة، خلال تصريحات إذاعية: “أنا كفنانة حساسة أوي بخصوص السوشيال ميديا، وبجد بكون حريصة جداً إن الناس متشفش مني حاجة مش كويسة، ومش بحب خالص أعرف الجمهور مشاكلي، وده لأن كل واحد عنده اللي مكفيه، وعلى طول لما بظهر للجمهور لازم يكون في أخبار سعيدة ومش بحب أنكد عليهم”.
وواصلت علا: “وعلشان مطولش عليكم كل اللي أقدر أقوله إني بمر بمرحلة مش كويسة خالص، وحقيقي مُحاطة ببعض الأكاذيب وعايشة فيلم غريب، وكل المشاكل اللي بعاني منها راحت لسكة القضاء، وماشية في خطوات حلوة دلوقتي، وأنا واثقة من نزاهة قضاء بلدي وإن حقي يرجع ليا، وده بالرغم من طول الوقت لكن بقول الحمد لله علشان أخدت من حوالي أسبوع خطوة نحو استرداد منزلي”.
وتابعت الفنانة: “وبجد كل حاجة اتسرقت مني، وإن شاء الله كل حاجة هترجع ليا، ومفيش حد هيتحاسب على حاجة غلط عملها، وده لأني مش بعرف حاجة اسمها الفشل واليأس، والكلمات دي بتخليني أقول دايماً ضروري تقفي حتى لو هقع بعد شوية، وفي النهاية كل حاجاتي لازم ترجعلي زي ماكانت.. ربنا مش بيرضى بالظلم”.
وتحدثت علا غانم، عن نقد الجمهور لها موضحة: “بجد أنا بشفق على الجيل الحالي، وده لأن الجحود اللي ظاهر في نفسيتنا على الآخر بيأثر علينا كمشاهير، فما بالك باللي لسه في أول الطريق ومحتاج للدعم والمساندة من الجمهور والنجوم الكبار علشان يكون عنده ثقة بنفسه ويشق طريقه نحو النجاح”.
وأضافت الفنانة: “وحتى الولد اللي عمل دور ابني في فيلم (أولاد حريم كريم)، علشان لسه جديد وطالع كان مُهمش شوية في اللوكيشن، ومكنش في حد مٌُهتم بيه خالص وبيجوا عليه في حاجات كتيرة، وأنا قدر استطاعتي بقيت أحاول أعدل من الأمور دي، وكنت ببعد عنه أي أذى نفسي”.
