“كنت بعلم نفسي بنفسي ومكنش عندي واسطة”.. نيللي كريم: «العمل بالفن مرض وده علشان اللي يقرب منه مش ممكن يبعد عنه»

كشفت الفنانة نيللي كريم، كواليس مشاركتها بالمسلسل الشهير “ذات”، والتي تُعد أول بطولة مُطلقة لها وحققت خلالها الكثير من النجاح، والذي تم عرضه عام 2013.

وأكدت الفنانة، أثناء استضافتها ببرنامج “أسرار النجوم”، والتي تقوم بتقديمة الإعلامية إنجي علي، والمُذاع عبر إذاعة “نجوم fm”، موضحة: “مكنتش متخيلة إن مسلسل (ذات) ينجح بالشكل ده، وخصوصاً إنه أول بطولة مُطلقة ليا، وبجد كنت مع مخرجة أكتر من رائعة.. كاملة أبو ذكري”.

وواصلت نيللي: “بدأنا تصوير أحداث العمل في 2011، وبعدها حصلت الظروف اللي كل الناس عارفاها، ووقفنا التصوير شوية، والمسلسل إتصور على مراحل وإتعرض 2013، وخد وقت كبير منا أثناء التصوير بسبب الأحداث اللي حصلت”.

وأضافت الفنانة: “وساعتها الإعلانات بتاع العمل كانت بتتعرض، وإحنا كنا بنعرض على قناة واحدة بس، وكان في شخص قاعد جنبي لما كنت بتفرج على الإعلان وكنت مُتفائلة وسعيدة أوي، وفجأة لقيته بيقول يارب حد يتفرج على المسلسل ده، وبعدها إتحولت من شخص مُتفائل لشخص تاني خالص”.

وتابعت نيللي: “وأنا مكنتش بفكر من اللي هيتفرج على العمل، أنا عملته وخلاص، وطبعاً مشفتهوش على بعضه، وبعد لما إتعرض منه حلقتين لقيت الناس كلها سعيدة وبتقول ذات والمسلسل من ساعتها راح لمكان تاني خالص مكنتش متواقعاه أبداً”.

وحينما سؤلت الفنانة، عن بدايتها الفنية وعن سر نجاحها وإبداعها خلال مسيرتها الفنية، ردت: “أنا بحب شغلي جداً وبحترمه، وأنا بعتبر الفن مرض من أهم الأمراض، وده علشان مجرد ما الواحدة منا بتتجه له مش بتقدر تسيبه بسهولة، ولما كنت في روسيا درست بيانو وموسيقى وبعدهم باليه ثم إخراج مسرح، ولما فكرت أشتغل بالتمثيل الموضوع جه بصورة تدريجية، والبداية كانت مع الفوازير المبنية على الاستعراضات، وبعدها اشتغلت مع الراحلة فاتن حمامة، وعملت دور طالبة بأكاديمية الفنون، وحقيقي الدور ده كانت متفصل عليا وواقعي جداً”.

وأنهت الفنانة: “وبعد كده بدأت أتعلم وأتعمق أكتر، وأنجح وأميز يعني إيه عمل جيد مع مخرج رائع وقصة حلوة، وكنت بعلم نفسي بنفسي ومكنش عندي واسطة، وساعتها السوشيال ميديا مكنتش بنفس المستوى، وأنا لسه بتعلم ومش بعيش على نجاح واحد وبس، وبقلب الصفحة على اللي بعدها”.