محمد صبحي: «إحنا إتخلينا عن أجمل ما فينا وهو إننا شعب عظيم.. كانوا بيطلبونا في بلاد تانية بسبب سمعتنا»

أثار الفنان المعروف محمد صبحي، الكثير من الجدل خلال الساعات القليلة الماضية، بعدما كشف عن رأية في العديد من القضايا الموجودة حالياً  على الساحة، وأشار بأن أبرز تلك القضايا علاقتنا بالسوشيال ميديا.

وأكد الفنان، أثناء توقيع كتابه “الأستاذ”، على هامش فعاليات معرض الساقية للكُتاب، موضحاً:ـ “حقيقي إحنا ضاع مننا نقاءنا وامتلكنا حاجة اسمها غلظة في كل شئ، وأنا بتكلم عن العالم كله مش عن مصر بس، وده مش كلام أنا مريت على عقود مُختلفة”.

وواصل محمد صبحي:ـ “وبجد إحنا إتخلينا عن أجمل ما فينا، وهو إننا شعب عظيم ومعروف عنه الشهامة والجدعنة، وكانوا بيطلبونا في بلاد تانية بسبب سمعتنا، وكمان كنا رواد في الثقافة والفن، ولكن دلوقتي لأ ولو في بنت قالت لولد لأ ممكن تدبح.. وليه إحنا كشعب دلوقتي بنكشف أسوأ ما فينا؟”.

وتابع الفنان:ـ “إحنا عملنا بلوك لحاجات حلوة كتيرة فينا، وده علشان التليفون بيعطلك عن الصلاة.. 16 ساعة الشاب ماسك التليفون في إيده، وكل اللي بيعمله بيشوف مين عمله لايك ومين قال كلام مش كويس أدخل أرد عليه، وحقيقي السوشيال ميديا بقت مجزرة لفظية وقتلاً معنوياً، وكمان بتروج للأطفال والشباب كارتون بيعلمهم المُثلية، وده المشروع اللي جاي للعالم.. عاوزين يعلموك أفكار توصلك للإلحاد وكمان تبيع وطنك وميكنش عندك حاجة اسمها وطن، ووطنك يكون السوشيال ميديا.. الوطن الخيالي اللي عايش فيه”.

وجديراً بالذكر، بأن الفنان محمد صبحي قدم مسرحية “نجوم الضهر”، وحقق الفنان الكثير من النجاح خلال العمل، وشاركه البطولة مجموعة كبيرة من نجوم الفن أبرزهم “جيهان قمري، وسميرة عبدالعزيز، وعبدالرحيم حسن، وندى ماهر، ومحمد أبو داوود”، وغيرهم الكثير، والعمل تأليف وإخراج محمد صبحي.