كشفت الفنانة ميرهان حسين، خلال لقائها مع الإعلامية ياسمين عز، في حلقة أمس الجمعة من برنامج “كلام الناس” الذي يعرض عبر قناة “MBC مصر” عن أسباب كتابة منشورها المثير للجدل الذي قالت فيه “عشان تبقي نجمة لازم تتجوزي منتج أو مخرج”.
حيث قالت: “من غير تزويق كلام كنت شايفة اللي أنا كتبته.. وما أعتقدش إن فيه حد مش شايفه.. دي حاجة موجودة.. هي مش كل اللي موجود.. بس موجود وبنسبة كبيرة ودي حاجة بالنسبة لي مؤسفة لإن الفن المفروض يكون بيخضع في المقام الأول للموهبة رقم واحد.. الموهبة والكاريزما طبعًا دول حاجتين أساسيتين طبعًا مش العلاقات.. وللأسف إحنا في الشغل عندنا في الوسط الفني عندنا العلاقات بتلعب دور كبير جدًا وشايفة إن ده مش المفروض.. أو ده ممكن يفيد بس في حالة وجود الموهبة وفي حالة وجود الكاريزما زي ما قولنا وفي حالة وجود حب الناس للشخص.. الناس عايزة تشوفه.. بدليل إن فيه ناس كتير ممكن يكونوا أبناء فنانين ومالقوش النجاح ده لإن هما مثلًا ما عندهمش الموهبة أو ما عندهمش حب الناس.. الناس بتقارنهم بأهلهم فممكن ياخدوا الفرصة لكن لازم الفرصة تكون أساسها الموهبة”.
وأضافت: “أنا ذكرت ساعتها إن لو واحدة متجوزة مخرج أو متجوزة منتج أو لو علاقات شخصية والله لو عندها الموهبة تمام.. مفيش حد هيلاقي ده ويقول لأ الصراحة يعني.. أنا مش ممكن أكون موهوبة ومثلًا أتجوزت مخرج هو شايف إن هو يديني الفرصة دي أكيد أنا مش هاجي أقول لأ.. لكن أنا بقول لأ على اللي تفتقر للموهبة.. ده مش المفروض.. ده فن المفروض يكون فيه موهبة.. ده كان قصدي”.
وردًا على سؤال “هل عرض عليكي الزواج من شخص كان ممكن يكون داعم ليكي ورفضتي؟”، أجابت ميرهان، ضاحكة: “يعني بصي.. برضه أنا دلوقتي تفكيري غير تفكيري قبل كده أو من أول ما بدأت أمثل يعني ممكن يكون ده اتقالي في الأول بس مش بالشكل ده ممكن يبقى عكسه.. ممكن يكون كان فيه ناس عايزاني ما أكملش.. ده اللي حصل كتير.. وفيه طبعًا ناس مش عارفة إذا جواز أو كده بس أنا فيه حاجات برفضها كده من البداية.. ولا أحب إن حد يقولي ما تشتغليش وأتجوزك.. ولا إن حد يجي يقولي أتجوزك وأشغلك.. أنا لو الشخص فعلًا هو شخص مناسب ليا وأقدر أحبه ويحبني ويكون شخص محترم أوكيه.. ومن وراها برضه يبقى فايدة إنه مخرج والمفروض إن أنا ممثلة كويسة برضه أه طبعًا”.
