“آخر موهبتي خط نص ومينفعش ألعب راس حربة”.. لطفي لبيب يكشف عن سبب عدم تقديمة أدوار البطولة خلال مشواره الفني

تحدث الفنان لطفي لبيب، عن الكثير من الأعمال الفنية التي قدمها خلال مسيرته الفنية، مؤكداً عن رضاه الكامل بخصوص عدم تقديمة البطولة المُطلقة كباقي فناني جيله، وأشار بأنه لم يُظلم وأن الأعمال عنده أهم بكثير، على حسب ما قاله.

وأكد الفنان، أثناء استضافته ببرنامج “من مصر”، والذي يقوم بتقديمة الإعلامي عمرو خليل، والمُذاع عبر فضائية “cbc”،:ـ “راضي جداً وسعيد وعايش كويس، وأنا لم أُظلم والأعمال هى الأبقى.. الأعمال هى الأبقى، وهى اللي هتفضل على طول، وأهم بكتير من الفلوس والأفيش والظهور وكل حاجة”.

وواصل الفنان:ـ “ولما نيجي نبص زمان كان في محسن سرحان، وكان خط النص بتاعه عبدالسلام النابلسي واستيفان روستي وزينات صدقي وحسين رياض والأصبجي، وأسماء كتير لها تاريخها وكانوا بيقدموا خط الوسط بس، ومحدش فيهم فكر إنه يكون مكان المهاجم، وبرغم من كده ظهروا ونجحوا وأسماءهم باقية إلى وقتنا هذا”.

وحينما سؤل لطفي، عن ندمه بسبب عدم تقديمة البطولة المطلقة، رد:ـ “مينفعش.. بص أنا آخر موهبتي خط نص، وواجب عليا إني لا أتجاوز هذا الأمر، وضروري ألعب في المنطقة بتاعتي، دي حاجة، والحاجة التانية في فنانين كتير حبوا إنهم يلعبوا في مكان مش بتاعهم ويلعبوا راس حربة، ولكن مواصفتهم وإمكانيتهم متجبش كده”.

وتابع الفنان:ـ “ولكن الشباب الموجود دلوقتي وجهة نظرهم إتغيرت كتير، وكل اللي يهمهم في الفن دلوقتي الفلوس والشهرة وبس، ولكن الموهبة فين؟.. أكيد بتكون في خط النص، ولكن راس الحربة بيلعب ماتش واحد ولو العمل وقع هو بيوقع معاه، ولكن خط النص بيلعب كل الماتشات وبيكون موجود على الساحة بإستمرار، ومكانه مش بيتأثر بأي حاجة بتحصل”.