كشفت الفنانة التشكيلية شاليمار الشربتلي زوجة المخرج المعروف خالد يوسف، كواليس من حياتها الشخصية، وأشارت إلى أنها لا تغار على زوجها حينما ترى العديد من الفتيات حوله.
وأكدت الفنانة، خلال لقائها بالإعلامية سهير جودة على هامش حضورها أحد المعارض، قائلة:ـ “أنا مش بغير على زوجي خالد يوسف لما بشوف بنات كتيرة حوله.. أغير ليه؟، دي طبيعة شغله وهما بيحاولوا ياخدوا فرصة في التمثيل، وعلى فكرة أنا مش متجوزة شيخ مسجد أنا متجوزة مخرج”.
وواصلت:ـ “وهو كمان اتجوز رسامة، وبيشوف ناس كتير حواليا وارتبطنا ببعض عن قناعة، وكل واحد فينا عارف طبيعة شغل التاني، وأنا أصلاً شخصية مش غيورة ودي أهم مواصفات برج الدلو”.
وتابعت:ـ “أنا لم أطلق اسم شاليمار على ابنتي، وخالد هو اللي اختاره وحب يعمل فيها رومانسي، واتفاجئت إنه بيكتبها شاليمار، وحقيقي هو وقت ولادة بنتي كان رومانسي أوي، وأنا مش بهتم بالشائعات حول زوجي ولكن بحاول اتجنبها.. إمال اللي متجوزة دكتور أمراض نسا تعمل إيه؟، واللي اختارت الحياة دي يبقى ضروري تعيشها”.
وأضافت:ـ “معنديش عتاب أوجه لجوزي..أعاتبه ليه؟، خالد وقف جنبي في مواقف كتيرة ويارب خليه ليا ولبنتي، وعلى فكرة أنا وخالد مختلفين جداً وكل شخص فينا له أفكار وآراء مختلفة عن التاني، ولكن بيجمع بينا الحب والإحترام حتى في عز أزماتنا”.
وحينما سؤلت عن التربية الحديثة للأطفال، ردت:ـ “أنا مش مُقتنعة بالتربية الحديثة، ومسئولية الأم أكبر مسئولية في العالم كله، وضروري تكون الأم قوية مش ضعيفة، والأم اللي بتتعامل مع أولادها بالشوكة والسكينة متبقاش أم، وده علشان كلمة ضنا حاجة كبيرة جداً، وأنا لما كنت صغيرة كنت عنيفة أوي وبضرب العيال.. طويلة بقى وواثقة من نفسي”.
