حورية فرغلي: اتجوزت مرة واحدة لمدة 3 شهور.. واتنازلت عن لقب ملكة جمال مصر لما اتقال إني ماشية مع ابن وزير
حلت الفنانة حورية فرغلي، ضيفة على الإعلامية ريهام سعيد، في أحدث حلقات برنامجها “صبايا” الذي يعرض عبر قناة “الشمس”.
وكشفت حورية، خلال الحلقة تفاصيل زيجتها الوحيدة قائلة: “اتجوزت مرة واحدة لمدة 3 شهور بس من نجل الإعلامي أحمد فراج.. واتطلقت بسبب كلام الجرايد”.
وأضافت: “ساعتها كنا في سنة 2003 قبل ما أدخل التمثيل.. والكلام اللي كان بيتكتب في الجرايد بسبب جايزة ملكة جمال مصر كان هو السبب في طلاقنا.. بس لحد دلوقتي إحنا أصحاب جدًا”.
وتابعت: “انفصالنا ما كانش بسبب الإنجاب.. لكن ما كناش سعدا مع بعض إحنا الاتنين وما كانش فيه توافق بينا.. وأنا فعلًا بعد الجواز اكتشفت إني ما بخلفش وماليش في الإنجاب بس مش ده سبب الطلاق”.
وأردفت: “فيه أكتر من دكتور أكدولي إني ماليش في الخلفة.. ودي حاجة مولودة بيها والحمد لله أنا راضية.. ولما كنت في إنجلترا عملت اختبار قالوا لي إن الرحم نفسه مش طبيعي”.
واستطردت: “لما كسبت لقب ملكة جمال مصر اتنازلت عنه للوصيفة (نور السمري).. لما اتقال إني ماشية مع ابن وزير والموضوع دخل في الأعراض وإني رشيت لجنة التحكيم.. فساعتها قولت مش عايزة الجايزة”.
واختتمت حديثها قائلة: “كنت على وشك إني أتجوز واحد من العيلة الحاكمة في الإمارات بس توفى قبل الزفاف بيوم.. ومحتفظة بكل هدية جابهالي ومن ساعتها ما ارتبطش بحد بعده”.
